അരങ്ങേറ്റ ചിത്രമായ ‘രോമാഞ്ച’ത്തിലൂടെ പ്രേക്ഷകശ്രദ്ധ നേടിയ സംവിധായകൻ ജിത്തു മാധവൻ വിവാഹിതനായി.സഹസംവിധായിക കൂടിയായ ഷിഫിന ബബിനെയാണ് ജിത്തു ജീവിതസഖി ആയി തിരഞ്ഞെടുത്തത്.ജിത്തു മാധവിനൊപ്പം രോമാഞ്ചം സിനിമയില്‍ അസോസിയേറ്റ് ഡയറക്ടര്‍ ആയി ഷിഫിന പ്രവര്‍ത്തിച്ചിരുന്നു.ഇരുവരും വിവാഹിതരായ സന്തോഷ വാർത്ത ഷിഫിന തന്നെയാണ് സോഷ്യൽ മീഡിയയിലൂടെ പങ്കുവെച്ചത്.
ആർഭാടങ്ങളൊന്നുമില്ലാതെ വളരെ ലളിതമായ ചടങ്ങിൽ നടന്ന വിവാഹത്തിന് അടുത്ത ബന്ധുക്കളും സുഹൃത്തുക്കളും പങ്കെടുത്തിരുന്നു.സിനിമാ പ്രവർത്തകരായ അൻവർ റഷീദ് , സമീർ സാഹിർ അടക്കമുള്ളവർ ചടങ്ങിൽ നേരിട്ടെത്തി നവദമ്പതികൾക്ക് ആശംസകൾ അറിയിച്ചു .കൂടാതെ അര്‍ജുന്‍ അശോകന്‍, ബിനു പപ്പു, നസ്രിയ നസിം, സിജു സണ്ണി, സൗബിന്‍ ഷാഹിര്‍ അടക്കമുള്ളവര്‍ സോഷ്യല്‍ മീഡിയയിലൂടെ വധൂവരന്മാര്‍ക്ക് ആശംസകള്‍ നേര്‍ന്നിട്ടുണ്ട്.
മലയാള സിനിമാലോകത്തിന് ഈ വർഷം മികച്ച വിജയം നേടിക്കൊടുത്ത ചിത്രമായിരുന്നു ജിത്തു മാധവ് സംവിധാനം ചെയ്ത രോമാഞ്ചം.കോമഡി ഹൊറർ വിഭാഗത്തിൽ ചിത്രീകരിച്ച സിനിമ മലയാളത്തിലെ എക്കാലത്തെയും പത്ത് വിജയ ചിത്രങ്ങളുടെ പട്ടികയിലും ഇടംപിടിച്ചിരുന്നു.റിലീസ് ചെയ്ത് 50-ാം ദിവസവും കേരളത്തിലെ 107 സ്ക്രീനുകളില്‍ ചിത്രം പ്രദര്‍ശിപ്പിച്ചു എന്നതാണ് രോമാഞ്ചം നേടിയ ജനപ്രീതിയുടെ ഏറ്റവും വലിയ തെളിവ്. 2007ല്‍ ബംഗളൂരുവില്‍ പഠിക്കുന്ന ഒരു കൂട്ടം സുഹൃത്തുക്കള്‍ക്കിടയില്‍ നടക്കുന്ന കഥയാണ് ചിത്രം പറയുന്നത്. ഓജോ ബോര്‍ഡും ആത്മാവിനെ ക്ഷണിച്ചുവരുത്തലുമൊക്കെ ചേര്‍ത്ത് ഭയത്തിന്‍റെയും അതിലേറെ ചിരിയുടെയും രസക്കൂട്ടിലാണ് ജിത്തു മാധവന്‍ ചിത്രമൊരുക്കിയത്.
അതേ സമയം രോമാഞ്ചത്തിൻ്റെ ഓളം സിനിമാസ്വാദകർക്കിടയിൽ കെട്ടടങ്ങും മുൻപേ അടുത്ത ചിത്രവുമായി എത്തുകയാണ് ജിത്തു മാധവ് .’ആവേശം’ എന്ന് പേരിട്ടിരിക്കുന്ന ചിത്രത്തിൽ നായകനായി എത്തുന്നത് ഫഹദ് ഫാസിൽ ആണ്.ക്യാമ്പസ് പശ്ചാത്തലത്തില്‍ ഒരുങ്ങുന്ന ഒരു കോമഡി എന്‍റര്‍ടെയ്നര്‍ വിഭാഗത്തിൽ പെടുന്ന ഈ ചിത്രത്തിൻ്റെ നിർമ്മാണം അന്‍വര്‍ റഷീദും നസ്രിയ നസീമും ചേര്‍ന്നാണ് നിർവഹിക്കുന്നത്.
