സന്നിധാനം: മണ്ഡലകാലം ആരംഭിച്ച അഞ്ചു ദിവസങ്ങൾ പിന്നിടുമ്പോൾ സന്നിധാനത്ത് ദർശനം നടത്തിയത് രണ്ടരലക്ഷത്തിലേറെ ഭക്തജനങ്ങള്‍. 12 സീറ്റ് വരെയുളള സ്വകാര്യ ടാക്‌സി വാഹനങ്ങള്‍ പമ്പയിലേയ്ക്ക് കടത്തിവിടാന്‍ തീരുമാനിച്ചതും തീര്‍ത്ഥാടകര്‍ക്ക് വളരെയേറെ സഹായകരമായി. ഇന്നും നാളെയുമായി തീർഥാടകരുടെ എണ്ണത്തിൽ വൻ വർദ്ധനവുണ്ടാകുമെന്നാണ് പോലീസും ദേവസ്വം ബോർഡും പറയുന്നത്. സന്നിധാനത്തും പമ്പയിലുമായി വൻ സൗകര്യങ്ങളാണ് തീർഥാടകർക്കായി ഒരുക്കിയിരിക്കുന്നത്.
ദാഹിച്ച്‌ വലയുന്നവര്‍ക്ക് സൗജന്യ ഔഷധകുടിവെള്ള വിതരണം, അന്നദാന മണ്ഡപത്തിലെ അന്നദാനം, സ്‌ട്രെക്ചര്‍ സര്‍വീസ്, സന്നിധാനം സര്‍ക്കാര്‍ ആശുപത്രിയിലെ കാര്‍ഡിയോളജി യൂനിറ്റ്, ആയൂര്‍വേദ-ഹോമിയോ ചികില്‍സ സൗകര്യങ്ങള്‍, കര്‍മ്മനിരതരായ വിശുദ്ധി സേനാംഗങ്ങളുടെ ശുചീകരണം, വിരിവെക്കാനുള്ള വിപുലമായ ഇടങ്ങള്‍, നവീകരിച്ച പൊതുശൗചാലയങ്ങള്‍ തുടങ്ങി വിപുലമായ സൗകര്യങ്ങളാണ് ഒരുക്കിയിരിക്കുന്നത്.
