മേടമാസ പൂജകൾക്കും വിഷു ഉത്സവത്തിനുമായി ശബരിമല ശ്രീധർമ്മശാസ്താ ക്ഷേത്രനട തുറന്നു. വെള്ളിയാഴ്ച വൈകുന്നേരം അഞ്ചുമണിക്ക് തന്ത്രി കണ്ഠര് മഹേഷ് മോഹനരുടെ സാന്നിധ്യത്തിൽ മേൽശാന്തി പ്രസാദ് ഇ.ഡി നടതുറന്ന് ദീപം തെളിയിച്ചതോടെ ഭക്തിനിർഭരമായ ചടങ്ങുകൾക്ക് തുടക്കമായി. നട തുറന്ന ശേഷം മേൽശാന്തി പതിനെട്ടാം പടിക്ക് താഴെയുള്ള ആഴിയിൽ അഗ്നി പകർന്നു.
ഭക്തർ ഏറെ ആകാംക്ഷയോടെ കാത്തിരിക്കുന്ന വിഷുക്കണി ദർശനം ഏപ്രിൽ 15-ന് പുലർച്ചെ നാലുമണി മുതൽ ആരംഭിക്കും. മേടവിഷുവും മേടമാസ പൂജകളും പ്രമാണിച്ചു തുടർച്ചയായ ഒൻപത് ദിവസങ്ങളിൽ അയ്യപ്പഭക്തർക്ക് ദർശനം നടത്താനുള്ള സൗകര്യങ്ങൾ ദേവസ്വം ബോർഡ് ഒരുക്കിയിട്ടുണ്ട്. ഏപ്രിൽ 18-ന് രാത്രി പത്തുമണിക്ക് മേടമാസ പൂജകൾ പൂർത്തിയാക്കി ഹരിവരാസനം പാടി നട അടയ്ക്കും.
ശബരിമല ദർശനത്തിന് എത്തുന്ന ഭക്തർക്ക് മുൻകൂട്ടി സ്ലോട്ടുകൾ ബുക്ക് ചെയ്യുന്നതിനായി വെർച്വൽ ക്യൂ സംവിധാനം ഏർപ്പെടുത്തിയിട്ടുണ്ട്. ദർശനം നടത്താൻ ആഗ്രഹിക്കുന്നവർ ഔദ്യോഗിക വെബ്സൈറ്റായ www.sabarimalaonline.org വഴി സ്ലോട്ടുകൾ ബുക്ക് ചെയ്യേണ്ടതാണ്. പമ്പയിലും പരിസരപ്രദേശങ്ങളിലും ഭക്തർക്കായി വിപുലമായ ക്രമീകരണങ്ങളാണ് ഇത്തവണ ഒരുക്കിയിരിക്കുന്നത്.
