ശബരിമല : മീനമാസ പൂജകൾക്കായി ശബരിമല ത്രനട തുറന്നു. ഇന്ന് വൈകിട്ട് അഞ്ചുമണിക്ക് തന്ത്രി കണ്ഠര് മഹേഷ് മോഹനരുടെ സാന്നിധ്യത്തിൽ മേൽശാന്തി പ്രസാദ് ഇ.ഡി. നടതുറന്ന് ദീപം തെളിയിച്ചു. ശേഷം പതിനെട്ടാം പതിനെട്ടാം പടിയ്ക്ക് താഴെ ആഴിയിൽ അഗ്നി പകർന്നു. മീനമാസം ഒന്നായ നാളെ പുലർച്ചെ അഞ്ചുമണിക്ക് ദർശനത്തിനായി നട തുറക്കും. മാർച്ച് 15 മുതൽ 19 വരെ കളഭാഭിഷേകവും പടിപൂജയും ഉൾപ്പെടെയുള്ള വിശേഷാൽ പൂജകൾ നടക്കും. 19-ന് രാത്രി പത്തിന് നട അടയ്ക്കും.
ശബരിമല ഉത്സവത്തിനായി മാർച്ച് 22-ന് വൈകിട്ട് അഞ്ചിന് വീണ്ടും നട തുറക്കും. മാർച്ച് 23-നാണ് ശബരിമല ഉത്സവത്തിന് കൊടിയേറുന്നത്. പത്തുദിവസത്തെ ഉത്സവ ചടങ്ങുകൾക്ക് ശേഷം മാർച്ച് 31-ന് പള്ളിവേട്ടയും ഏപ്രിൽ ഒന്നിന് ഭഗവാന് പമ്പയിൽ ആറാട്ടും നടക്കും. ഏപ്രിൽ ഒന്നിന് രാവിലെ ഒൻപതിന് സന്നിധാനത്തുനിന്നും ആറാട്ട് ഘോഷയാത്ര പമ്പയിലേക്ക് പുറപ്പെടും. ആറാട്ടിനു ശേഷം ഘോഷയാത്ര സന്നിധാനത്ത് തിരിച്ചെത്തിയ ശേഷം അന്ന് രാത്രി പത്തിന് നട അടയ്ക്കും.
ദർശനം നടത്താൻ ആഗ്രഹിക്കുന്ന ഭക്തർ വെർച്വൽ ക്യൂ വെബ്സൈറ്റ് (www.sabarimalaonline.org) വഴി സ്ലോട്ട് ഉറപ്പുവരുത്തണം. സന്നിധാനത്ത് താമസം ആവശ്യമുള്ളവർക്ക് www.onlinetdb.com എന്ന വെബ്സൈറ്റിലൂടെ മുറികൾ മുൻകൂട്ടി ബുക്ക് ചെയ്യാവുന്നതാണ്.
