പത്തനംതിട്ട : ശബരിമലയില്‍ വീണ്ടും ആചാരലംഘനത്തിനുള്ള ശ്രമവുമായി സര്‍ക്കാര്‍. കര്‍ണാടക സ്വദേശിനികളായ രണ്ട് യുവതികളെ സന്നിധാനത്തെത്തിക്കാനായിരുന്നു പോലീസിന്റെ ശ്രമം. എന്നാല്‍ വിവരമറിഞ്ഞ് ഭക്തര്‍ ഒന്നടങ്കം എതിര്‍പ്പുമായി എത്തിയതോടെ ഈ നീക്കം പാളുകയായിരുന്നു.
തെരഞ്ഞെടുപ്പ് പ്രഖ്യാപിച്ചതോടെ ശബരിമലയിലെ നിയന്ത്രണങ്ങളില്‍ സര്‍ക്കാര്‍ ഇളവ് വരുത്തിയിരുന്നു. നിരോധനാജ്ഞ പ്രഖ്യാപിക്കുന്നതില്‍ നിന്നും, വന്‍ പോലീസ് സന്നാഹം ഒരുക്കുന്നതില്‍ നിന്നും പിന്മാറിയെങ്കിലും യുവതികളെ പ്രവേശിപ്പിക്കണമെന്ന നീക്കത്തില്‍ നിന്നും സര്‍ക്കാര്‍ പിന്നോട്ട് പോയിട്ടില്ലെന്ന് വ്യക്തമാക്കുന്നതാണ് പോലീസിന്റെ സഹായത്തോടെയുള്ള സര്‍ക്കാര്‍ ശ്രമങ്ങള്‍.
ശബരിമല പ്രചാരണ വിഷയമാക്കരുതെന്ന് തെരഞ്ഞെടുപ്പ് കമ്മീഷന്‍ കഴിഞ്ഞ ദിവസം നിര്‍ദേശിച്ചിരുന്നു . എന്നാല്‍ മണ്ഡലമേതായാലും മണ്ഡലകാലം മറക്കില്ലെന്നായിരുന്നു വിശ്വാസികളുടെ പ്രതികരണം . നവോത്ഥാനത്തിന്റെ പേരില്‍ ശബരിമലയില്‍ ആചാരലംഘനം നടത്താന്‍ സര്‍ക്കാര്‍ നടത്തിയ നീക്കങ്ങള്‍ തുടരുകയാണെന്നാണ് സൂചനകള്‍ വ്യക്തമാക്കുന്നത്.
