ബെംഗളൂരു : ഇന്ത്യ ആതിഥേയത്വം വഹിക്കുന്ന സൗത്ത് ഏഷ്യന്‍ ഫുട്‌ബോള്‍ ഫെഡറേഷന്‍ ടൂര്‍ണമെന്റില്‍ (സാഫ് കപ്പ്) പാകിസ്ഥാൻ ടീം പങ്കെടുക്കുമെന്ന് ഓള്‍ ഇന്ത്യ ഫുട്‌ബോള്‍ ഫെഡറേഷന്‍ സെക്രട്ടറി ഷാജി പ്രഭാകരന്‍ വ്യക്തമാക്കി. ജൂണ്‍-ജൂലായ് മാസങ്ങളിലായി ബെംഗളൂരുവില്‍ വെച്ചാണ് ടൂര്‍ണമെന്റ് നടക്കുന്നത്.
എട്ട് ടീമുകളാണ് ടൂര്‍ണമെന്റില്‍ പങ്കെടുക്കുന്നത്. ജൂണ്‍ 21 മുതല്‍ ജൂലായ് 4 വരെയാണ് ടൂര്‍ണമെന്റ്. ലെബനനും കുവൈത്തും ഇത്തവണ സാഫ് ഫുട്‌ബോളിൽ പങ്കെടുക്കും. കഴിഞ്ഞ മാര്‍ച്ചില്‍ നടന്ന സാഫ് എക്‌സിക്യുട്ടീവ് കമ്മിറ്റിയിലാണ് സാഫ് പരിധിക്ക് പുറത്തുള്ള രണ്ട് ടീമുകളെ ടൂര്‍ണമെന്റില്‍ പങ്കെടുപ്പിക്കാമെന്ന തീരുമാനമുണ്ടാകുന്നത്. ഇതാണ് ലെബനനും കുവൈത്തിനും ടൂർണമെന്റിൽ പങ്കെടുക്കാൻ വഴിയൊരുക്കിയത്.
