തിരുവനന്തപുരം: വിഴിഞ്ഞം അന്താരാഷ്ട്ര തുറമുഖത്തിന് കസ്റ്റംസിന്റെ സെക്ഷന് 7 എ അംഗീകാരം. ഇതു സംബന്ധിച്ച ഗസറ്റ് വിജ്ഞാപനം പുറത്തിറങ്ങി. ഇതോടെ കയറ്റുമതിയും ഇറക്കുമതിക്കുമതിയും നിയമവിധേയമായി അംഗീകരിക്കപ്പെട്ട തുറമുഖമായി വിഴിഞ്ഞം മാറി. കേന്ദ്ര കസ്റ്റംസ് മന്ത്രാലയം മുന്നോട്ടുവച്ച മാര്ഗനിര്ദ്ദേശങ്ങള് കൃത്യമായി പൂർത്തിയാക്കിയതോടെയാണ് വിഴിഞ്ഞത്തിന് അനുമതി ലഭിച്ചത്. ഓഫീസ് സൗകര്യങ്ങള്, കെട്ടിടങ്ങള് കമ്പ്യൂട്ടർ സംവിധാനം, മികച്ച സര്വ്വര് റൂം ഫെസിലറ്റി, തുടങ്ങി 12 മാര്ഗ നിര്ദ്ദേശങ്ങളാണ് കസ്റ്റംസ് മുന്നോട്ടു വച്ചിരുന്നത്. വിഴിഞ്ഞത്തെ കസ്റ്റംസ് പോര്ട്ടായി അംഗീകരിച്ചതായി സംസ്ഥാന തുറമുഖവകുപ്പ് മന്ത്രി വി.എന് വാസവന് അറിയിച്ചു.
ഇനി സെക്ഷന് 8 , സെക്ഷന് 45 പ്രകാരമുള്ള അംഗീകാരങ്ങളും, പോര്ട്ട് കോഡുമാണ് വിഴിഞ്ഞത്തിന് ലഭിക്കാനുള്ളത്. നേരത്തെ തുറമുഖത്തിന് ഇന്ത്യയുടെ ആദ്യ ട്രാന്സ്ഷിപ്പ്മെന്റ് തുറമുഖമായി പ്രവര്ത്തിക്കാനുള്ള അനുമതി കേന്ദ്ര ഷിപ്പിംഗ് മന്ത്രാലയത്തില് നിന്ന് ലഭിച്ചിരുന്നു. ഇത് പ്രകാരം ഇന്ത്യയുടെ പ്രാദേശിക ഭാഗങ്ങളില് നിന്ന് ചെറുകപ്പലുകളിലെത്തുന്ന ചരക്കുകളോ കണ്ടെയ്നറുകളോ വിഴിഞ്ഞത്തു വച്ച് കൂറ്റൻ മദര്ഷിപ്പുകളിലേക്ക് മാറ്റി വിദേശ തുറമുഖങ്ങളിലേക്ക് അയക്കാനാകും. അത് പോലെ തന്നെ വിദേശത്തുനിന്ന് മദര്ഷിപ്പുകളിലെത്തുന്ന കണ്ടെയ്നറുകള് വിഴിഞ്ഞത്തുവച്ച് ചെറുകപ്പലുകളിലേക്ക് മാറ്റി പ്രാദേശിക തുറമുഖങ്ങളിലേക്കും അയക്കാം.
