കണ്ണൂര്: ഇന്നലെ രാത്രിമുതൽ പെയ്യുന്ന ശക്തമായ മഴയിൽ കണ്ണൂര് സെന്ട്രല് ജയിലിന് അകത്തുള്ള സുരക്ഷാ മതില് ഇടിഞ്ഞുവീണു. മുപ്പത് മീറ്ററോളം ദൂരമാണ് മതില് ഇടിഞ്ഞുവീണതെന്ന് പോലീസുകാർ പറയുന്നു. 1860ല് നിര്മ്മിച്ച മതിലാണ് കനത്ത മഴയില് തകര്ന്നത്. ഇന്നലെ രാത്രി മുതല് പെയ്ത മഴയും കാലപ്പഴക്കുവുമാണ് മതില് ഇടിയാന് കാരണമായതെന്ന് ജയില് സൂപ്രണ്ട് പി വിജയന് പറഞ്ഞു. വിവരം ഡിജിപി, കലക്ടര് ഉള്പ്പടെ എല്ലാവരെയും അറിയിച്ചതായി ജയില് സൂപ്രണ്ട് മാദ്ധ്യമങ്ങളോട് പറഞ്ഞു.
ജയിലിലെ ഒന്പതാം ബ്ലോക്കിന് സമീപത്തുള്ള മതിലാണ് ഇടിഞ്ഞത്. മതിലിന് ഏകദേശം 160 വര്ഷത്തിലേറേ പഴക്കമുണ്ട്. മതില് ഇടിഞ്ഞതിനെ തുടര്ന്ന് കുറ്റവാളികള് ചാടിപ്പോകാതിരിക്കാനായി കൂടുതല് സുരക്ഷാ സേനയെ വിന്യസിക്കും. ലീവിലുള്ള ഉദ്യോഗസ്ഥരെ തിരികെ ഡ്യൂട്ടിയിലേക്ക് വിളിച്ചിട്ടുണ്ട്. മതിലിന്റെ മറ്റ് ഭാഗങ്ങളും ഇടിയാന് സാധ്യതയുണ്ടെന്നാണ് വിലയിരുത്തല്. ആ ഭാഗങ്ങളിലേക്ക് പോകന്നതിന് നിയന്ത്രണം ഏര്പ്പെടുത്തിയിട്ടുണ്ട്.
