കണ്ണൂർ: ചട്ടങ്ങൾ ലംഘിച്ച് കൈവശം വെച്ചിരുന്ന അഞ്ചരക്കണ്ടി ഡെന്റൽ കോളേജിന്റെ ഭൂമി തിരിച്ചെടുക്കാൻ കണ്ണൂർ താലൂക്ക് ലാൻഡ് ബോർഡ് ഉത്തരവിട്ടു. കോളേജിന്റെ ഭൂമി ഇടപാടുകൾ നിയമവിരുദ്ധമാണെന്ന് കണ്ടെത്തിയതിനെത്തുടർന്നാണ് നടപടി. ഇതോടെ കോളേജ് മാനേജ്‌മെന്റിനും ഉടമ ജബ്ബാർ ഷാജിക്കും കുടുംബത്തിനും ഈ ഭൂമിയിലുള്ള നിയമപരമായ അവകാശം നഷ്ടമായി.
അഞ്ചരക്കണ്ടി, പടുവിലായി വില്ലേജുകളിലായാണ് വിവാദമായ ഈ ഭൂമി സ്ഥിതി ചെയ്യുന്നത്. പ്ലാന്റേഷൻ (തോട്ടം) ഭൂമിയായി തരംതിരിച്ചിരുന്ന ഇടത്ത് സർക്കാരിന്റെ മുൻകൂർ അനുമതിയില്ലാതെ നിർമ്മാണ പ്രവർത്തനങ്ങൾ നടത്തിയതാണ് പ്രധാന നിയമലംഘനമായി ലാൻഡ് ബോർഡ് ചൂണ്ടിക്കാട്ടുന്നത്. 1964-ലെ ഭൂപരിഷ്‌കരണ നിയമത്തിന് ശേഷം നടന്ന എല്ലാ ഭൂമി കൈമാറ്റങ്ങളും റദ്ദാക്കിക്കൊണ്ടാണ് ലാൻഡ് ബോർഡിന്റെ നിർണ്ണായകമായ ഈ നടപടി.
പ്ലാന്റേഷൻ നിയമപ്രകാരം ഇളവ് ലഭിച്ച ഭൂമിയിൽ മറ്റ് നിർമ്മാണങ്ങൾ പാടില്ലെന്ന വ്യവസ്ഥ ലംഘിക്കപ്പെട്ടതായി ഉത്തരവിൽ പറയുന്നു. മിച്ചഭൂമി കേസിൽ വർഷങ്ങളായി നടന്നുവന്ന നിയമനടപടികൾക്കൊടുവിലാണ് ഇപ്പോൾ ഭൂമി സർക്കാരിലേക്ക് തിരിച്ചുപിടിക്കാൻ തീരുമാനമായത്. കണ്ണൂർ താലൂക്ക് ലാൻഡ് ബോർഡിന്റെ ഈ ഉത്തരവ് ഡെന്റൽ കോളേജിന്റെയും അനുബന്ധ സ്ഥാപനങ്ങളുടെയും പ്രവർത്തനത്തെ ബാധിച്ചേക്കും.
