തിരുവനന്തപുരം: സംസ്ഥാനത്ത് നിലനിൽക്കുന്ന കടുത്ത വൈദ്യുതി പ്രതിസന്ധിയെത്തുടർന്ന് നിയന്ത്രണങ്ങൾ ഏർപ്പെടുത്തുന്നത് ഒഴിവാക്കാനാകാത്ത അടിയന്തര സാഹചര്യമാണെന്ന് വൈദ്യുതി മന്ത്രി സണ്ണി ജോസഫ്. മുൻ വർഷങ്ങളെ അപേക്ഷിച്ച് സംസ്ഥാനത്ത് ഇലക്ട്രിസിറ്റി ഉപയോഗം കുത്തനെ കൂടുകയും എന്നാൽ ആഭ്യന്തര ഉൽപാദനത്തിൽ വലിയ രീതിയിൽ ഇടിവ് രേഖപ്പെടുത്തുകയും ചെയ്തതാണ് നിലവിലെ പ്രതിസന്ധിക്ക് പ്രധാന കാരണമെന്ന് മന്ത്രി വാർത്താക്കുറിപ്പിലൂടെ വിശദീകരിച്ചു. പ്രതിസന്ധി പരിഹരിക്കാൻ സർക്കാർ തലത്തിൽ സാധ്യമായ എല്ലാ ഇടപെടലുകളും നടത്തുന്നുണ്ടെന്നും അദ്ദേഹം ഉറപ്പുനൽകി.
ആഭ്യന്തര ഉൽപാദനത്തിലെ കുറവിന് പുറമെ വൈദ്യുത വിപണിയിലെ കനത്ത വിലക്കയറ്റവും കെ.എസ്.ഇ.ബിക്ക് വലിയ പ്രതിസന്ധിയാണ് സൃഷ്ടിക്കുന്നത്. ഇതിനൊപ്പം വേനൽക്കാലത്ത് മറ്റ് സംസ്ഥാനങ്ങളിൽ നിന്ന് കടം വാങ്ങിയ 530 മെഗാവാട്ട് വൈദ്യുതി ഇപ്പോൾ തിരികെ നൽകേണ്ടി വരുന്നതും ബോർഡിന് വലിയ തിരിച്ചടിയായി മാറിയിരിക്കുകയാണ്. യു.ഡി.എഫ് സർക്കാരിന്റെ കാലത്തുണ്ടായിരുന്ന ദീർഘകാല കരാറുകൾ റദ്ദാക്കിയതും, പകലളവിൽ ലഭ്യമാകുന്ന സോളാർ വൈദ്യുതി രാത്രികാലങ്ങളിലേക്ക് സംഭരിച്ചു സൂക്ഷിക്കാൻ ആവശ്യമായ സാങ്കേതിക സംവിധാനങ്ങൾ ഇല്ലാത്തതും നിലവിലെ പ്രതിസന്ധിയുടെ ആഴം വർദ്ധിപ്പിച്ചതായി മന്ത്രി ചൂണ്ടിക്കാട്ടി.
കടുത്ത വൈദ്യുതി ക്ഷാമം നേരിടുന്നതിനാൽ ഇന്നും സംസ്ഥാനത്ത് രാത്രികാലങ്ങളിൽ പവർ കട്ടിന് വലിയ സാധ്യതയുണ്ടെന്നാണ് കെ.എസ്.ഇ.ബി നൽകുന്ന സൂചന. വൈകുന്നേരങ്ങളിലെ പീക്ക് സമയങ്ങളിൽ വൈദ്യുതി ഉപയോഗം പരമാവധി കുറച്ചില്ലെങ്കിൽ സംസ്ഥാനവ്യാപകമായി നിയന്ത്രണം അനിവാര്യമായി വരും. പവർ എക്സ്ചേഞ്ചിൽ നിന്ന് ആവശ്യമായ അളവിൽ വൈദ്യുതി വാങ്ങാൻ കിട്ടാത്ത സാഹചര്യത്തിൽ കഴിഞ്ഞ ദിവസവും രാത്രി 7:15 മുതൽ 12:15 വരെ സംസ്ഥാനത്തിന്റെ വിവിധ ഭാഗങ്ങളിൽ കെ.എസ്.ഇ.ബി വൈദ്യുതി നിയന്ത്രണം ഏർപ്പെടുത്തിയിരുന്നു. സമാനമായ ഒരു അവസ്ഥയാണ് ഇന്നും നിലനിൽക്കുന്നത്.
നിലവിലെ അടിയന്തര സാഹചര്യം കണക്കിലെടുത്ത് വൈദ്യുതി ഉപഭോഗം കുറയ്ക്കാൻ ഉപഭോക്താക്കൾ സഹകരിക്കണമെന്ന് മന്ത്രി അഭ്യർത്ഥിച്ചു. പ്രത്യേകിച്ച് രാത്രികാലങ്ങളിൽ എയർ കണ്ടീഷണറുകൾ , അലങ്കാര വിളക്കുകൾ തുടങ്ങിയവയുടെ ഉപയോഗം പരമാവധി നിയന്ത്രിക്കാൻ പൊതുജനങ്ങൾ തയ്യാറാകണം. പ്രതിസന്ധി എത്രയും വേഗം പരിഹരിക്കാൻ കെ.എസ്.ഇ.ബിയും സർക്കാരും സാധ്യമായ എല്ലാ ബദൽ മാർഗ്ഗങ്ങളും തേടുന്നുണ്ടെന്നും മന്ത്രി സണ്ണി ജോസഫ് വാർത്താക്കുറിപ്പിൽ അറിയിച്ചു.
