കൊച്ചി: നടനും നിർമ്മാതാവുമായ വിജയ് ബാബുവിനെതിരായ ലൈംഗിക പീഡനപരാതി ഉയർന്ന പശ്ചാത്തലത്തിൽ താരസംഘടനയായ അമ്മയില് ഭിന്നത രൂക്ഷമാകുന്നു. വിഷയവുമായി ബന്ധപ്പെട്ട് അമ്മയുടെ മൃദുസമീപനത്തിലാണ് പ്രതിഷേധം ശക്തമാകുന്നത്.
ഇതോടെ അമ്മയുടെ ആഭ്യന്തര പരാതി പരിഹാര സമിതിയില് നിന്ന് നടിമാരായ ശ്വേത മേനോനും കുക്കു പരമേശ്വരനും രാജിവെച്ചു. ആഭ്യന്തര പരാതി പരിഹാര സമിതി അധ്യക്ഷ കൂടിയാണ് ശ്വേതാ മേനോന്. ഇ മെയില് വഴിയാണ് അമ്മ നേതൃത്വത്തിന് ഇരുവരും രാജിക്കത്ത് കൈമാറിയിട്ടുള്ളത്.
അതേസമയം ആഭ്യന്തര പരാതി പരിഹാര സമിതിയില് നിന്നും കഴിഞ്ഞദിവസം നടി മാലാ പാര്വതി രാജിവെച്ചിരുന്നു. തുടർന്ന് ശ്വേതയും കുക്കു പരമേശ്വരനും രാജിവെക്കുമെന്ന് മാലാ പാര്വതി ഇന്നലെ സൂചിപ്പിച്ചിരുന്നു.
ഇതിനു പിന്നാലെ മാലാപാര്വതിയുടെ അഭിപ്രായം തള്ളിക്കൊണ്ട് അമ്മ വൈസ് പ്രസിഡന്റ് മണിയന് പിള്ള രാജു രംഗത്തെത്തിയിരുന്നു. ശ്വേതയും കുക്കു പരമേശ്വരനും അമ്മയ്ക്കൊപ്പമുണ്ടെന്നും, വിജയ് ബാബു വിഷയത്തില് അമ്മ എക്സിക്യൂട്ടീവ് എടുത്ത തീരുമാനത്തിനൊപ്പമാണ് അവരെന്നുമാണ് മണിയന്പിള്ള രാജു അഭിപ്രായപ്പെട്ടത്. എന്നാൽ അമ്മ സംഘടനയെ ഞെട്ടിച്ചുകൊണ്ടാണ് ഇവരുടെ ഈ നീക്കം.