ദില്ലി: ട്രാഫ്രിക് നിയമ ഭേദഗതിയിലെ ഉയര്ന്ന പിഴ വ്യവസ്ഥക്കെതിരെ ബിജെപി ഭരിക്കുന്ന കൂടുതല് സംസ്ഥാനങ്ങള് രംഗത്ത്. പിഴ തുക കുറക്കണമെന്ന് മഹാരാഷ്ട്രയും ഗോവയും ബീഹാറും ആവശ്യപ്പെട്ടു. അതേസമയം, കര്ണാടക സര്ക്കാര് ഉയര്ന്ന പിഴ തുകയില് ഇളവ് നല്കി. ഗുജറാത്തിന് പിന്നാലെ ഉത്തരാഖണ്ഡും ഇന്നലെ പിഴ കുറച്ചിരുന്നു.
ട്രാഫിക് നിയമലംഘനത്തിനുള്ള പിഴയില് ഇളവ് വരുത്തുന്നത് പരിശോധിക്കാന് ഗതാഗത സെക്രട്ടറിക്ക് കര്ണാടക മുഖ്യമന്ത്രി ബി.എസ് യെദിയൂരപ്പ നിര്ദ്ദേശം നല്കി. ഗുജറാത്ത് സര്ക്കാരിന്റെ ഉത്തരവ് പഠിച്ച് റിപ്പോര്ട്ട് നല്കാനാണ് നിര്ദേശം. പൊതുവികാരം കണക്കിലെടുത് നാല് ദിവസത്തിനുള്ളില് തീരുമാനം എടുക്കുമെന്ന് ഉപമുഖ്യമന്ത്രി ലക്ഷ്മണ് സാവധിയും വ്യക്തമാക്കി.
നിയമ ഭേദഗതി അപ്രായോഗികമാണെന്ന് ചൂണ്ടിക്കാട്ടിയാണ് ആന്ധ്രപ്രദേശ്, രാജസ്ഥാന്, മധ്യപ്രദേശ് എന്നീ സര്ക്കാരുകള് നിയമം നടപ്പാക്കാതെ വച്ചിരിക്കുന്നത്. സുപ്രീംകോടതിയെ സമീപിക്കാനാണ് ഇവരുടെ തീരുമാനം.
