തിരുവനന്തപുരം: അറബിക്കടലില് ലക്ഷദ്വീപ് മേഖലയില് രൂപം കൊണ്ട ‘മഹാ’ ചുഴലിക്കാറ്റിനെ തുടര്ന്ന് സംസ്ഥാനത്ത് ശക്തമായ മഴ. സംസ്ഥാനത്തിന്റെ വിവിധയിടങ്ങളില് വരുംമണിക്കൂറുകളില് ശക്തമായതോ അതിശക്തമായതോ ആയ മഴയ്ക്കുള്ള സാധ്യതയുണ്ടെന്ന് കാലാവസ്ഥാ നിരീക്ഷണ വകുപ്പ് അറിയിച്ചു. എറണാകുളം തൃശൂര്, മലപ്പുറം, കോഴിക്കോട് ജില്ലകളില് ഓറഞ്ച് അലേര്ട്ട് പ്രഖ്യാപിച്ചു.
ലക്ഷദ്വീപില് അതീവജാഗ്രതാ നിര്ദേശമാണ് നല്കിയിരിക്കുന്നത്. ബുധനാഴ്ച മുതല് നിര്ത്താതെ തുടരുന്ന പെരുമഴയില് താഴ്ന്ന പ്രദേശങ്ങളെല്ലാം വെള്ളത്തിലായി. എറണാകുളം ജില്ലയിലെ നാല് താലൂക്കുകളിലെ വിദ്യാഭ്യാസ സ്ഥാപനങ്ങള്ക്ക് അവധി പ്രഖ്യാപിച്ചു. കൊച്ചി, പറവൂര്, കൊടുങ്ങല്ലൂര്, ചാവക്കാട് താലൂക്കുകളിലെ വിദ്യാഭ്യാസ സ്ഥാപനങ്ങള്ക്കാണ് അവധി.
എറണാകുളം എടവനക്കാട് കടല്ക്ഷോഭമുണ്ടായി. തീരത്തുനിന്ന് ആളുകളെ മാറ്റിപ്പാര്പ്പിച്ചു. ദുരിതാശ്വാസ ക്യാമ്പ് തുറന്നിട്ടുണ്ട്. പാറശാല-നെയ്യാറ്റിന്കര പാതയില് മണ്ണിടിച്ചിലിനെ തുടര്ന്ന് ട്രെയിന് ഗതാഗതം തടസപ്പെട്ടു. പരശുറാം എക്സ്പ്രസ് പാറശാലയില് നിര്ത്തിയിട്ടിരിക്കുകയാണ്. പാളത്തിലെ മണ്ണ് നീക്കിയ ശേഷം ട്രെയിന് ഗതാഗതം പുനസ്ഥാപിക്കാന് തീവ്രശ്രമം നടക്കുകയാണ്.
എംജി സര്വകലാശാല വ്യാഴാഴ്ച നടത്താനിരുന്ന പരീക്ഷകള് മാറ്റിയിട്ടുണ്ട്. മഹാ ചുഴലിക്കാറ്റ് ഉച്ചയ്ക്കു മുമ്പ് ശക്തിപ്രാപിക്കുമെന്നാണ് റിപ്പോര്ട്ട്. തീരമേഖലയിലും മലയോര മേഖലയിലും ചില നേരങ്ങളില് ശക്തമായ കാറ്റ് വീശാന് സാധ്യതയുണ്ട്. കേരളം മഹാ ചുഴലിക്കാറ്റിന്റെ സഞ്ചാരപഥത്തിലില്ലെങ്കിലും കേരള തീരത്തോട് ചേര്ന്ന കടല് പ്രദേശത്ത് രൂപം കൊണ്ടിരിക്കുന്ന ചുഴലിക്കാറ്റിന്റെ പ്രഭാവം കേരളത്തിലും ഉണ്ടാകാനിടയുണ്ട്.
അതിപ്രക്ഷുബ്ദാവസ്ഥയിലുള്ള കടലില് മത്സ്യത്തൊഴിലാളികള് പോകരുത്. കട ല്ത്തീരത്തു പോകുന്നതും ഒഴിവാക്കണം. സംസ്ഥാനത്ത് അടുത്ത രണ്ടു ദിവസം കൂടി ഒറ്റപ്പെട്ട കനത്ത മഴയ്ക്കു സാധ്യതയുണ്ടെന്നാണ് കാലാവസ്ഥാ നിരീക്ഷണകേന്ദ്രത്തിന്റെ മുന്നറിയിപ്പ്. ഇതേത്തുടര്ന്ന് എറണാകുളം, തൃശൂര്, മലപ്പുറം, കോഴിക്കോട് ജില്ലകളില് ഓറഞ്ച് അലര്ട്ട് പ്രഖ്യാപിച്ചു. മറ്റെല്ലാ ജില്ലകളിലും ഇന്ന് യെല്ലോ അലര്ട്ടും പ്രഖ്യാപിച്ചു. കോ ഴിക്കോട്, കണ്ണൂര്, കാസര്ഗോഡ് ജില്ലകളില് വെള്ളിയാഴ്ചയും യെല്ലോ അലര്ട്ട് പ്രഖ്യാപിച്ചിട്ടുണ്ട്.
