തിരുവനന്തപുരം : സംസ്ഥാനത്ത് വൈദ്യുതിയുടെ ഉപഭോഗം സര്‍വകാല റെക്കോര്‍ഡില്‍. വേനൽ കടുത്തതോടെ എസിയുടെയും അനുബന്ധ ഉപകരണങ്ങളുടെയും ഉപയോഗം വർധിച്ചതാണ് വൈദ്യുതി ഉപഭോഗം കുതിച്ചുയരാൻ കാരണമായത്. ഇന്നലത്തെ സംസ്ഥാനത്തെ മൊത്തം വൈദ്യുതി ഉപഭോഗം നൂറ് ദശലക്ഷ യൂണിറ്റ് കടന്നിരിക്കുകയാണ്. ഈ സാഹചര്യത്തില്‍ വൈദ്യുതി കരുതലോട് ഉപയോഗിക്കാൻ നിര്‍ദേശിക്കുകയാണ് കെഎസ്ഇബി.
ഇന്നലത്തെ പീക്ക് സമയത്ത് ആവശ്യമായി വന്നത് 5031 മെഗാവാട്ട് വൈദ്യുതിയാണ്. കഴിഞ്ഞ വർഷം വേനൽ കൊടുമ്പിരി കൊണ്ടിരുന്ന ഏപ്രിൽ 18ന് രേഖപ്പെടുത്തിയ 5024 മെഗാവാട്ടിന്റെ റെക്കോർഡാണ് ഇതോടെ മറികടന്നത്. വേനൽ കടുക്കുന്ന ഏപ്രിൽ, മെയ് മാസങ്ങൾ ഇനിയും വരാനിരിക്കെ ഇതേ സ്ഥിതി തുടർന്നാൽ സംസ്ഥാനം വൈദ്യുതി ക്ഷാമത്തിലേക്ക് പോകുന്നതിനും, വൈദ്യുതി കടമെടുക്കുന്നതുമായി ബന്ധപ്പെട്ട പ്രതിസന്ധികളിലേക്ക് എത്തിപ്പെടുന്നതിനുമെല്ലാം കാരണമാകാം.
