ദില്ലി: തെരുവിൽ കൂടി നടക്കുന്നവരെ പട്ടി കടിക്കുന്നത് അംഗീകരിക്കാനാകില്ലെന്ന് സുപ്രീംകോടതി. അപകടകാരികളായ നായ്‌ക്കളേയും പേവിഷം ബാധിച്ച നായ്‌ക്കളേയും പ്രത്യേകം കേന്ദ്രങ്ങളിൽ അടച്ചു കൂടേ എന്നും കോടതി ഇന്ന് ചോദിച്ചു. കേരളത്തിലെ തെരുവുനായ പ്രശ്‌നത്തിൽ ഈ മാസം 28ന് സുപ്രീംകോടതി ഇടക്കാല ഉത്തരവ് പുറപ്പെടുവിക്കും. കേരളത്തിലെ തെരുവുനായ വിഷയം സംബന്ധിച്ച് സുപ്രീംകോടതിക്ക് മുന്നിലെത്തിയ ഒന്നിലധികം ഹർജികളിലാണ് കോടതി ഇന്ന് വിശദമായ വാദം കേട്ടത്.
പേവിഷബാധയ്‌ക്കെതിരായ വാക്‌സിൻ സ്വീകരിച്ച മരണങ്ങളെ സംബന്ധിച്ച് ഹർജിക്കാർക്ക് വേണ്ടി ഹാജരായ അഡ്വ.വി.കെ.ബിജു കോടതിയെ അറിയിച്ചു. എന്നാൽ തെരുവുനായകളെ കൊന്നൊടുക്കരുതെന്ന ഹർജിയുമായി മൃഗസ്‌നേഹികളും കോടതിയെ സമീപിച്ചിരുന്നു. അപകടകാരികളായ നായ്‌ക്കളെ പ്രത്യേക കേന്ദ്രത്തിലേക്ക് മാറ്റുന്നതിനെ കുറിച്ച് ആലോചിച്ച് കൂടേ എന്ന് കോടതി ചോദിച്ചു. മാത്രമല്ല തെരുവിലൂടെ നടക്കുന്നവരെ നായ കടിക്കുന്നു എന്നത് അംഗീകരിക്കാനാകില്ലെന്നും, തെരുവുനായ പ്രശ്‌നം കേരളത്തിലുണ്ട് എന്നതിനെ അംഗീകരിക്കണമെന്നും കോടതി നിരീക്ഷിച്ചു.
