ഇന്ത്യയുടെ ജ്ഞാനപ്രകാശമായി ലോകമറിഞ്ഞ യുഗപുരുഷൻ സ്വാമി വിവേകാനന്ദന്റെ 158–ാം ജന്മവാർഷികമാണ് ഇന്ന്. ഉൾക്കരുത്തും നവോന്മേഷവും ബഹുസ്വരവുമായ ഇന്ത്യയെ വാർത്തെടുക്കാനുള്ള ഊർജസ്രോതസായിരുന്നു സ്വാമി വിവേകാനന്ദൻ. ഭാരതത്തിൻ്റെ ഭാവി യുവാക്കളിലൂടെ മാത്രമാണെന്ന് സ്വാമി വിവേകാനന്ദൻ ഉറച്ചു വിശ്വസിച്ചു. തൻ്റെ ഓരോ വാക്കും പ്രവർത്തിയും അവർക്കുള്ള ഊർജ പ്രവാഹമായി അദ്ദേഹം മാറ്റി. യാതൊരു ബാഹ്യപ്രേരണയും കൂടാതെ യുവാക്കളുടെ മനോബലം വർധിപ്പിക്കുക എന്ന കർമ്മം അദ്ദേഹം നിർവഹിച്ചു. ഇവയൊക്കെയും അദ്ദേഹത്തിൽ നിന്ന് ഭാരതത്തിന് ലഭിച്ച സൗഭാഗ്യമാണ്.
കേവലം 39 വർഷം മാത്രം ഈ ഭൂമിയിൽ ജീവിച്ച അദ്ദേഹത്തിൻ്റെ വിചാരധാര ഇന്നും പൊതുസമൂഹത്തിൽ പ്രസക്തമായി നിൽക്കുന്നു. ആ മഹാത്മാവിൻ്റെ ദീർഘവീക്ഷണം എത്രമാത്രം ആഴത്തിലുള്ളതായിരുന്നു എന്നത് നമ്മെ ബോധിപ്പിക്കുന്ന വസ്തുതയാണ്. ദീർഘവീക്ഷണം എന്ന വാക്കിന് സ്വാമി വിവേകാനന്ദൻ എന്ന് പര്യായം നൽകിയാലും അതിൽ തെല്ലും അതിശയോക്തിയില്ല.
1863 ജനുവരി 12 ന് കൊൽക്കത്തയിൽ ജനിച്ച നരേന്ദ്രനാഥ് ദത്ത എന്ന നരേന്ദ്രൻ വിധിയുടെ നിയോഗത്താൽ ശ്രീരാമകൃഷ്ണ പരമഹംസരുടെ വത്സല ശിഷ്യനായി. പിന്നീട് നരേന്ദ്രൻ ലോകാരാധ്യനായ സ്വാമി വിവേകാനന്ദനായി ഇന്നും അനേകായിരം മനസുകളിൽ നിറഞ്ഞ് നിൽക്കുന്നു. 1893 സെപ്റ്റംബർ 11 ന് അമേരിക്കയിലെ ചിക്കാഗോയിൽ വെച്ച് നടന്ന സർവ രാഷ്ട്ര മതമഹാസമ്മേളനത്തിൽ സ്വാമി വിവേകാനന്ദൻ നടത്തിയ ‘അമേരിക്കയിലെ സഹോദരീ സഹോദരന്മാരെ’ എന്നാരംഭിക്കുന്ന ഒരൊറ്റ പ്രസംഗം കൊണ്ട് ഭാരതത്തെ ലോകത്തിന് മുൻപിൽ അവതരിപ്പിച്ച് അദ്ദേഹം ചരിത്രം തിരുത്തി കുറിച്ചു.
ഒരു ഹിന്ദു സന്യാസിയുടെ പ്രവർത്തനങ്ങൾക്കപ്പുറം ഒരു സാമൂഹ്യ പരിഷ്കർത്താവ് എന്ന നിലയിലുള്ള തൻ്റെ വ്യക്തി പ്രഭാവം പാശ്ചാത്യ ലോകർക്ക് മുൻപിൽ വിവേകാനന്ദന് തുറന്നു കാണിക്കാൻ സാധിച്ചത് അദ്ദേഹം ആത്മാഭിമാനിയായ ഒരു ഭാരതീയൻ ആയിരുന്നതുകൊണ്ടു മാത്രമാണ്.
‘ഞാൻ സത്യത്തിന് വേണ്ടി നിലകൊള്ളുന്നു. സത്യം ഒരിക്കലും അസത്യത്തോടു കൂട്ടുകൂടുകയില്ല. സമസ്ത ലോകവും എനിക്ക് എതിരായി വന്നാലും സത്യം തന്നെ അവസാനം ജയിക്കും.’ – സ്വാമി വിവേകാനന്ദൻ എന്നും ഉറച്ച് വിശ്വസിച്ചിരുന്ന ആശയമായിരുന്നു. ഭാരതത്തിൻ്റെ ഉന്നമനത്തിന് വേണ്ടി യുവജനതയ്ക്ക് അദ്ദേഹം നൽകിയ സംഭാവനകളിൽ ‘വല്ലവരും വെറും വാഗ്വാദത്തിനു നിങ്ങളെ സമീപിക്കുകയാണെങ്കിൽ വിനയപൂർവം പിന്മാറുക. എല്ലാ മതവിഭാഗക്കാരോടും ഉദാരമായി പെരുമാറുക. ഈ മൗലിക ഗുണങ്ങൾ നിങ്ങളിലുണ്ടെങ്കിലേ നിങ്ങൾക്ക് ഊർജസ്വലമായി പ്രവർത്തിക്കാൻ കഴിയൂ’ എന്ന വാക്കുകൾക്ക് എത്രമാത്രം കാലിക പ്രസക്തിയുണ്ടെന്നതിന് സോഷ്യൽ മീഡിയ ഏറ്റവും വലിയ ഒരു ഉദാഹരണം ആണ്.
ദേശീയ യുവജന ദിനമായി ഭാരതം ആചരിക്കുന്ന വിവേകാനന്ദ ജയന്തി നാളിൽ വിവേകാനന്ദ പ്രതിമയിൽ പുഷ്പാർച്ചന നടത്തിയതു കൊണ്ടോ അദ്ദേഹത്തിൻ്റെ ഫോട്ടോ വെച്ച് സോഷ്യൽ മീഡിയയിൽ ഒരു പോസ്റ്റ് ഇട്ടതുകൊണ്ടോ നാം സ്വാമി വിവേകാനന്ദന് വേണ്ടിയോ നമ്മുടെ നാടിന് വേണ്ടിയോ ഒന്നും ചെയ്യുന്നില്ല. സ്വാമി വിവേകാനന്ദനെ ആദരിക്കാൻ ആഗ്രഹിക്കുന്ന വ്യക്തിയാണ് നിങ്ങളെങ്കിൽ അത് ചെയ്യേണ്ടത്, അദ്ദേഹത്തിൻ്റെ തന്നെ വാക്കുകളിൽ പറഞ്ഞാൽ ‘അസൂയയും അഹങ്കാരവും ദൂരെക്കളയൂ. അന്യർക്ക് വേണ്ടി യോജിപ്പോടെ പണിയെടുക്കാൻ പഠിക്കൂ; ഇതാണ് നമ്മുടെ രാജ്യത്തിന്റെ ഇന്നത്തെ ആവശ്യം’ എന്ന രീതിയിൽ ആണ്.
ഭാരതത്തിൽ ജനിക്കാൻ കഴിഞ്ഞത് തന്നെ നമ്മളോരോരുത്തരുടെയും ഭാഗ്യം. അപ്പോൾ ഭാരതീയനായി ഭാരതത്തിനു വേണ്ടി ജീവിക്കാൻ കഴിയുക എന്നത് നമ്മുടെ സൗഭാഗ്യമായി തന്നെ കരുതി ആത്മാഭിമാനത്തോടെ മുൻപോട്ടു പോകുക. അതാണ് ഭാരതത്തിലെ യുവതലമുറയ്ക്ക് സ്വാമി വിവേകാനന്ദന് നൽകാൻ കഴിയുന്ന എറ്റവും വലിയ ആദരം.
