തിരുവനന്തപുരം: ടാറ്റൂ ആര്ട്ടിസ്റ്റിനെതിരായ ലൈംഗിക പീഡന കേസില് പരാതിപ്പെടാന് മടികാണിക്കേണ്ടെന്ന് സംസ്ഥാന വനിത കമ്മീഷന് അധ്യക്ഷ അഡ്വ. പി. സതീദേവി. കേസില് പോലീസ് ശക്തമായ നടപടി എടുക്കുമെന്ന് ഉറപ്പ് തന്നിട്ടുണ്ടെന്നും സതീദേവി പറഞ്ഞു.
ടാറ്റൂ ചെയ്യുന്നതിനിടെ ലൈംഗികമായി പീഡിപ്പിച്ചെന്ന കേസില് കൊച്ചിയിലെ ഇന്ക്ഫെക്ടഡ് ടാറ്റൂ സ്റ്റുഡിയോ ഉടമ സുജീഷിനെതിരെ പരാതി ഉയർന്നിരുന്നു. 7 പേരാണ് ഇയാൾക്കെതിരെ പരാതിപ്പെട്ടത്. ബംഗ്ലുരുവില് താമസിക്കുന്ന മലയാളിയാണ് വെള്ളിയാഴ്ച കൊച്ചി സിറ്റി പോലീസ് കമീഷണര്ക്ക് ഇമെയില് വഴി അവസാനമായി പരാതി നല്കിയത്.
ബലാത്സംഗ ശ്രമം, ലൈംഗിക അതിക്രമം എന്നിവ ആരോപിച്ച് ഇന്നലെ കൊച്ചി കമീഷണര് ഓഫീസില് യുവതികള് നേരിട്ടെത്തി പരാതി നല്കിയിരുന്നു. ടാറ്റൂ ചെയ്യുന്നതിനിടെ സുജീഷ് തന്നോട് അപമര്യാദയായി പെരുമാറുകയും ലൈംഗികമായി പീഡിപ്പിക്കുകയും ചെയ്തുവെന്ന് കഴിഞ്ഞ ദിവസമാണ് ഒരു യുവതി തുറന്നു പറഞ്ഞത്. യുവതിയുടെ ആരോപണത്തിന് പിന്നാലെ മറ്റുള്ളവരും പരാതിയുമായി രംഗത്ത് വന്നു.
നാലായിരം യുവതികള്ക്ക് പ്രതി ഇന്നര് ടാറ്റൂ ചെയ്തിട്ടുണ്ടെന്ന് പോലീസിന്റെ പ്രാഥമിക അന്വേഷണത്തില് കണ്ടെത്തിയിട്ടുണ്ട്. പീഡനാരോപണത്തില് അഞ്ച് കേസുകളാണ് സൂജീഷിനെതിരെ ചുമത്തിയിട്ടുള്ളത്. ചേരാനെല്ലൂര് പോലീസ് സ്റ്റേഷനില് രണ്ട് പീഡന കേസുകളും പലാരിവട്ടം പോലീസ് സ്റ്റേഷനില് മൂന്ന് പീഡനശ്രമക്കേസുകളുമാണ് രജിസ്റ്റര് ചെയ്തത്.
