കോയമ്പത്തൂര് – ലഷ്ക്കര് ഇ തോയ്ബയില് പെട്ട നാല് ഭീകരര് കോയമ്പത്തൂരില് എത്തിയതായി കേന്ദ്ര ആഭ്യന്തര മന്ത്രാലയത്തിന്റെ മുന്നറിയിപ്പ്. വാര്ത്ത സ്ഥിരീകരിച്ചിട്ടില്ലെങ്കിലും മുന്നറിയിപ്പിനെ തുടര്ന്ന് സംസ്ഥാന പോലീസ് റെഡ് അലേര്ട്ട് പ്രഖ്യാപിച്ചു. പ്രദേശത്തുള്ള സേനാവിഭാഗങ്ങളോടും സുസജ്ജമായിരിക്കാന് കേന്ദ്ര ആഭ്യന്തര മന്ത്രാലയം ആവശ്യപ്പെട്ടിട്ടുണ്ട്.
ശ്രീലങ്കയില് നിന്നാണ് നാല് ഭീകരര് കടല് മാര്ഗ്ഗം തമിഴ്നാട്ടിലേക്ക് കടന്നതെന്ന് കരുതപ്പെടുന്നു.ഇവരില് മൂന്ന് പേര് ശ്രീലങ്കന് മുസ്ലീങ്ങളും ഒരാള് പാകിസ്താനിയുമാണെന്നാണ് റിപ്പോര്ട്ട്.ശ്രീലങ്കയില് നടന്ന ഡിസംബര് 25ലെ ആക്രമണത്തിന് ശേഷം അധികൃതര് നടത്തുന്ന വ്യാപകമായ തിരച്ചിലില് നിന്ന് രക്ഷപ്പെട്ടാകാം ഇവര് ഇന്ത്യയിലെത്തിയതെന്നാണ് സൂചന.
ഇവരുടെ പക്കല് ആയുധശേഖരം ഉണ്ടോയെന്ന് ഈ ഘട്ടത്തില് സ്ഥിരീകരിക്കാന് ഇന്റിലിജന്സ് ഏജന്സികള്ക്ക് സാധിച്ചിട്ടില്ല. ഈ സംഘത്തില് പെട്ട പാകിസ്താനി ഭീകരന് ഇന്റര്പോളിന്റെ നിരീക്ഷണത്തിലുള്ള ആള് ആണെന്നാണ് രഹസ്യാന്വേഷണവിഭാഗം നല്കുന്ന സൂചന. ഇവര്ക്കായി കോയന്പത്തൂരിലും പരിസരപ്രദേശങ്ങളിലും പോലീസ് ഇപ്പോള് വ്യാപകമായ തിരച്ചില് നടത്തുന്നുണ്ട്.