മാഞ്ചസ്റ്ററിൽ നടന്ന നാലാമത് ആനന്ദ് ടി.വി ഫിലിം അവാർഡ്‌സിൽ എത്തിയ മലയാളി താരങ്ങളുടെ ചിത്രങ്ങളും വീഡിയോകളും സോഷ്യൽ മീഡിയയിൽ വൈറലായിരുന്നു. 2021ലെ മികച്ച നടനുള്ള പുരസ്‌കാരത്തിന് അർഹനായത് ടോവിനോ തോമസായിരുന്നു. മമ്മൂട്ടിയുടെ കയ്യിൽ നിന്നാണ് താരം പുരസ്‌കാരം ഏറ്റുവാങ്ങിയത്. ഇപ്പോഴിതാ അതിന്റെ സന്തോഷം പങ്കുവെച്ചെത്തിയിരിക്കുകയാണ് ടൊവിനോ തോമസ്.
മമ്മൂക്കയിൽ നിന്ന് ഒരു അവാർഡും അനുഗ്രഹവും നല്ല വാക്കുകളും സ്വീകരിക്കുന്നതിന്റെ അവിശ്വസനീയമായ നിമിഷം. ഒപ്പം നിന്ന് അദ്ദേഹം എന്നെക്കുറിച്ച് സന്തോഷകരമായ കാര്യങ്ങൾ പറയുന്നത് കേൾക്കുന്നത് ശരിക്കും അതിശയിപ്പിക്കുന്നതായിരുന്നു. ജീവിതത്തിൽ ഇനി അങ്ങോട്ട് ഇത് അഭിമാനത്തോടെ മുന്നോട്ട് കൊണ്ടുപോകും. മമ്മൂക്കയുടെ കയ്യിന്നാണ് അവാർഡും അനുഗ്രഹവും കിട്ടിയിരിക്കുന്നത്. ഇനി എന്നെ പിടിച്ചാ കിട്ടൂല്ല എന്നാണ് ടൊവിനോ ചിത്രം പങ്കുവച്ചു കൊണ്ട് ഇൻസ്റ്റാഗ്രാമിൽ കുറിച്ചിരിക്കുന്നത്.
അതേസമയം, ഈ അവാർഡ് ഭാര്യയും ഭർത്താവുമൊന്നിച്ച വന്ന ഒരാൾക്കുള്ളതാണ്, അവസാനം പുറത്തിറങ്ങിയ ചിത്രത്തിൽ ഇയാളൊരു സാക്രിഫൈസിങ്ങ് ക്യാരക്റ്ററാണ് ചെയ്തത്. ആ ചിത്രത്തിൽ അദ്ദേഹം മരിക്കുമ്പോൾ നമ്മുടെ നെഞ്ചൊന്ന് നീറും, മലയാളത്തിലെ ആദ്യ സൂപ്പർഹീറോ കഥാപാത്രം അഭിനയിച്ച ആൾ എന്നിങ്ങനെയുള്ള വിശേഷണങ്ങൾ നൽകിയാണ് ടൊവിനോയെ മമ്മൂട്ടി വേദിയിലേക്ക് ക്ഷണിച്ചത്. മമ്മൂക്ക പറഞ്ഞ ഈ നല്ല വാക്കുകൾ സിഡിയിലാക്കി തന്നാൽ വീട്ടിൽ കൊണ്ടുപോയി ഇടയ്ക്കിടയ്ക്ക് കാണാമായിരുന്നു എന്നാണ് ഇതിന് മറുപടിയായി ടൊവിനോ പറഞ്ഞത്.
