മുംബൈ : എട്ടു പതിറ്റാണ്ടിലേറെയായി ഭാരതത്തിന്റെ കാതുകളിൽ തേന്മഴ പെയ്യിച്ച ഇതിഹാസ ഗായിക ആശാ ഭോസ്‌ലെ അന്തരിച്ചു. 92 വയസ്സായിരുന്നു. മുംബൈയിലെ ശിവാജി പാർക്കിൽ നാളെ വൈകുന്നേരം നാലു മണിക്ക് സംസ്കാര ചടങ്ങുകൾ നടക്കും. ഇന്നലെ പുലർച്ചെ നെഞ്ചിലെ അണുബാധയെയും കടുത്ത ക്ഷീണത്തെയും തുടർന്ന് മുംബൈയിലെ ബ്രീച്ച് കാൻഡി ആശുപത്രിയിൽ പ്രവേശിപ്പിച്ച ആശാ ഭോസ്‌ലെ ഇന്ന് അന്തരിക്കുകയായിരുന്നു. മകൻ ആനന്ദ് ഭോസ്‌ലെയാണ് മരണവാർത്ത സ്ഥിരീകരിച്ചത്. ഈ വരുന്ന സെപ്റ്റംബറിൽ 93-ാം ജന്മദിനം ആഘോഷിക്കാനിരിക്കെയാണ് സംഗീത ലോകത്തെ ഞെട്ടിച്ചുകൊണ്ട് അവർ വിടവാങ്ങിയത്.
തന്റെ പത്താം വയസ്സിൽ ‘മാത്സ ബാൽ’ എന്ന മറാത്തി ചിത്രത്തിലൂടെ ചലച്ചിത്ര പിന്നണി ഗാനരംഗത്തെത്തിയ ആശാ ഭോസ്‌ലെ, സംഗീതത്തിന്റെ എല്ലാ മേഖലകളിലും തന്റെ വ്യക്തിമുദ്ര പതിപ്പിച്ചു. ഇന്ത്യൻ ചലച്ചിത്ര സംഗീതത്തിലെ നിത്യവിസ്മയമായ ലതാ മങ്കേഷ്‌കറിന്റെ അനുജത്തിയായിരിക്കുമ്പോഴും സ്വന്തമായൊരു പാത വെട്ടിത്തെളിക്കാൻ അവർക്ക് സാധിച്ചു. പ്രശസ്ത സംഗീത സംവിധായകൻ ആർ.ഡി. ബർമന്റെ സംഗീതത്തിൽ പിറന്ന തകർപ്പൻ ഡാൻസ് നമ്പറുകൾ മുതൽ ‘ഉമറാവു ജാനി’ലെ വികാരനിർഭരമായ ഗസലുകൾ വരെ ആശയുടെ ശബ്ദത്തിൽ അനശ്വരമായി. ശർമിള ടാഗോർ മുതൽ ഐശ്വര്യ റായ് വരെയുള്ള വിവിധ തലമുറകളിലെ നടിമാർക്കായി അവർ ആലാപനം നിർവ്വഹിച്ചു.
രണ്ട് ദേശീയ അവാർഡുകൾ, ദാദാസാഹേബ് ഫാൽക്കെ പുരസ്കാരം, പത്മവിഭൂഷൺ തുടങ്ങി രാജ്യം നൽകാവുന്ന ഏറ്റവും വലിയ ആദരങ്ങളെല്ലാം ഈ സംഗീത പ്രതിഭയെ തേടിയെത്തി. സംഗീതമായിരുന്നു ആശയുടെ ശ്വാസം. തൊണ്ണൂറാം വയസ്സിലും ദുബായിൽ തത്സമയ സംഗീത പരിപാടി അവതരിപ്പിച്ചുകൊണ്ട് അവർ ലോകത്തെ അത്ഭുതപ്പെടുത്തി. ജീവിതത്തിൽ നേരിട്ട വ്യക്തിപരമായ നഷ്ടങ്ങളെയും തിരിച്ചടികളെയും സംഗീതം കൊണ്ടാണ് അവർ നേരിട്ടത്. ഭർത്താവ് ആർ.ഡി. ബർമൻ, മക്കളായ വർഷ, ഹേമന്ത് എന്നിവരുടെ വിയോഗം അവരെ തളർത്തിയെങ്കിലും സംഗീതത്തോടുള്ള അഭിനിവേശത്തിൽ അവർ മുന്നോട്ട് കുതിച്ചു.
മാറുന്ന കാലത്തിനൊപ്പം സഞ്ചരിച്ച ഗായികയായിരുന്നു അവർ. സോഷ്യൽ മീഡിയയിൽ ദശലക്ഷക്കണക്കിന് ഫോളോവേഴ്‌സുള്ള അവർ പുതിയ കാലത്തെ ഹിറ്റ് പാട്ടുകൾ വരെ തന്റെ വേദിയിൽ ആലപിച്ചിരുന്നു. 2022-ൽ പുറത്തിറങ്ങിയ ‘ലൈഫ്‌സ് ഗുഡ്’ എന്ന ചിത്രത്തിലെ ഗാനമാണ് അവർ ഒടുവിലായി റെക്കോർഡ് ചെയ്തത്. ആശാ ഭോസ്‌ലെയുടെ വിയോഗത്തോടെ ഇന്ത്യൻ സംഗീതത്തിലെ ഒരു സുവർണ്ണ അധ്യായത്തിനാണ് തിരശ്ശീല വീഴുന്നത്. എങ്കിലും ആയിരക്കണക്കിന് ഗാനങ്ങളിലൂടെയും വശ്യമായ ആ ശബ്ദത്തിലൂടെയും അവർ കോടിക്കണക്കിന് ആരാധകരുടെ മനസ്സിൽ എന്നെന്നും ജീവിക്കും.
