മലപ്പുറം: മഞ്ചേരിയിൽ സംസ്ഥാനത്തെ തന്നെ ഏറ്റവും വലിയ എംഡിഎംഎ വേട്ടകളിലൊന്ന്. 10 കിലോയിലേറെ എംഡിഎംഎയുമായി മൂന്ന് പേരെ മഞ്ചേരി പോലീസ് അറസ്റ്റ് ചെയ്തു. കോയമ്പത്തൂരിൽ നിന്നാണ് വൻതോതിൽ മയക്കുമരുന്നുമായി പ്രതികളെ പിടികൂടിയത്. മയക്കുമരുന്ന് വിൽപ്പന സംഘത്തെ കേന്ദ്രീകരിച്ച് മഞ്ചേരി പോലീസ് നടത്തിയ അന്വേഷണത്തിലാണ് ലഹരിമരുന്നിന്റെ ഞെട്ടിക്കുന്ന ശേഖരം കണ്ടെത്തിയത്. പിടിയിലായവരിൽ രണ്ട് പേർ മലപ്പുറം സ്വദേശികളും ഒരാൾ വയനാട് സ്വദേശിയുമാണ്.
മഞ്ചേരിയിൽ നേരത്തെ നടത്തിയ പരിശോധനയിൽ 96 ഗ്രാം എംഡിഎംഎയുമായി ആറുപേരെ പോലീസ് പിടികൂടിയിരുന്നു. ഇവരിൽനിന്ന് ലഭിച്ച നിർണായക വിവരങ്ങളുടെ അടിസ്ഥാനത്തിൽ അന്വേഷണം വ്യാപിപ്പിച്ചതോടെയാണ് വൻ ലഹരിശേഖരത്തിലേക്ക് പോലീസ് എത്തിയത്.എവിടെ നിന്നാണ് എംഡിഎംഎ എത്തിച്ചത്? ആരൊക്കെയാണ് ഇതിന് പിന്നിൽ? സംസ്ഥാനത്തിന്റെ ഏതെല്ലാം ഭാഗങ്ങളിലേക്കാണ് ലഹരിമരുന്ന് എത്തിച്ചിരുന്നത്? തുടങ്ങിയ കാര്യങ്ങളിലാണ് അന്വേഷണം പുരോഗമിക്കുന്നത്.
അറസ്റ്റിലായ മൂന്ന് പേരെയും വിശദമായി ചോദ്യം ചെയ്യുകയാണ്. ഇവരിൽനിന്ന് ലഭിക്കുന്ന വിവരങ്ങളുടെ അടിസ്ഥാനത്തിൽ കൂടുതൽ അറസ്റ്റുകൾ ഉണ്ടായേക്കുമെന്നാണ് സൂചന.സംസ്ഥാനത്തിന്റെ വിവിധ ഭാഗങ്ങളിലേക്ക് എംഡിഎംഎ എത്തിച്ചിരുന്ന വൻ ലഹരിമരുന്ന് ശൃംഖലയിലേക്കാണ് മഞ്ചേരി പോലീസിന്റെ അന്വേഷണം നീളുന്നത്.
