തൃശൂര്: വെങ്ങിണിശേരിയിൽ അപകടത്തില്പ്പെട്ട കാറില് നിന്ന് വടിവാള് കണ്ടെത്തി. കാറിലുണ്ടായിരുന്ന നാല് പേര് മറ്റൊരു വാഹനത്തില് കടന്നതായി പൊലീസ്. സംഭവസ്ഥലത്ത് പൊലീസും ഫൊറന്സിക് വിദഗ്ധരും പരിശോധന നടത്തുകയാണ്.
KL 51B 976 നമ്പറിലുള്ള കാരൻ അപകടത്തിൽപെട്ടിരിക്കുന്നത്. ഇന്ന് രാവിലെ ഏഴ് മണിയോടെയായിരുന്നു അപകടം ഉണ്ടായത്. ഒരു മിനി ലോറിയുമായി കാര് കൂട്ടിയിടിക്കുകയായിരുന്നു. നാല് പേരാണ് കാറില് ഉണ്ടായിരുന്നതെന്ന് ദൃക്സാക്ഷികള് വ്യക്തമാക്കി.
അപകടത്തിന് ശേഷം ഇവര് മറ്റൊരു കാറില് കയറി രക്ഷപ്പെടുകയായിരുന്നു. തങ്ങള്ക്ക് പരാതിയില്ലെന്ന് ലോറി ഡ്രൈവറെ അറിയിച്ച ശേഷമാണ് എല്ലാവരും രക്ഷപെട്ടത്. നാട്ടുകാര് വിവരമറിയിച്ചതിനെ തുടര്ന്ന് പൊലീസ് എത്തി പരിശോധന നടത്തി. ഈ പരിശോധനയിലാണ് കാറില് നിന്ന് വടിവാള് കണ്ടെത്തിയത്. പാലക്കാട് ഇരട്ടകൊലപാതകവുമായി സംഭവത്തിന് ബന്ധമുണ്ടോയെന്ന് പൊലീസ് പരിശോധിച്ച് വരികയാണ്.