റിയാദ് : സൗദി അറേബ്യയും ഹൂതികളും തമ്മിലുള്ള സംഘര്‍ഷം കൂടുതല്‍ രൂക്ഷമാകുന്നു. സൗദിയിലെ അരംകോ (Aramco) ആസ്ഥാനം ലക്ഷ്യമിട്ടാണ് ഹൂതികളുടെ നീക്കം. സൗദിയിലേക്കുള്ള ഹൂതി ആക്രമണങ്ങളെ രൂക്ഷമായി വിമര്‍ശിച്ച അമേരിക്കന്‍ പ്രസിഡന്റ് ഡോണള്‍ഡ് ട്രമ്പ്, ഇത്തരം ആക്രമണങ്ങള്‍ നടത്തിയത് നല്ലതല്ലെന്ന് ഹൂതികള്‍ക്ക് മുന്നറിയിപ്പ് നല്‍കി. ഹൂതികള്‍ വളരെ മോശമായാണ് പെരുമാറുന്നതെന്നും ട്രമ്പ് വ്യക്തമാക്കി.
‘ഒരു വര്‍ഷം മുന്‍പ് യു.എസ് നടത്തിയ ബോംബ് ആക്രമണത്തില്‍ അവര്‍ പാഠം പഠിച്ചെന്നാണ് കരുതിയത്. എന്നാല്‍ യു.എസില്‍ തെരഞ്ഞെടുപ്പ് നടക്കുന്നതിന് തൊട്ടുമുന്‍പ് ഇറാന്റെ പിന്തുണയോടെ സൗദിയിലേക്ക് അവര്‍ ആക്രമണം നടത്തുന്നത് അത്ര നല്ലതല്ല,’ ട്രമ്പ് ‘ട്രൂത്ത് സോഷ്യലില്‍’ കുറിച്ചു. തെരഞ്ഞെടുപ്പിന് ശേഷം താന്‍ ഇവിടെ തന്നെയുണ്ടാകുമെന്നും ഒന്നും മറക്കില്ലെന്നും ഹൂതികള്‍ക്ക് ട്രമ്പ് മുന്നറിയിപ്പ് നല്‍കി.
അതേസമയം, നിലവിലെ സംഘര്‍ഷാവസ്ഥയും സുരക്ഷാ പ്രശ്‌നങ്ങളും കണക്കിലെടുത്ത് സൗദി അറേബ്യയിലേക്കുള്ള സര്‍വീസുകള്‍ ഈ മാസം 17 വരെ ഇന്ത്യന്‍ വിമാനക്കമ്പനികള്‍ റദ്ദാക്കിയിട്ടുണ്ട്. സൗദി അറേബ്യയിലേക്കുള്ള യാത്ര പുനഃപരിശോധിക്കാന്‍ യു.എസ് പൗരന്മാരോട് അവിടുത്തെ എംബസി ആവശ്യപ്പെട്ടു. കൂടാതെ, ഭീകരവാദ ഭീഷണി ചൂണ്ടിക്കാട്ടി യമനിലേക്കുള്ള യാത്ര പൂര്‍ണ്ണമായി ഒഴിവാക്കാനും പൗരന്മാരോട് നിര്‍ദ്ദേശിച്ചിട്ടുണ്ട്.
കഴിഞ്ഞ ഏതാനും ദിവസങ്ങളായി സൗദി അറേബ്യയിലെ വിമാനത്താവളങ്ങള്‍ ഉള്‍പ്പെടെ കേന്ദ്രീകരിച്ചാണ് ഹൂതികള്‍ ആക്രമണം നടത്തുന്നത്. യെമന്റെ മൂന്നിലൊന്ന് ഭൂപ്രദേശവും രാജ്യത്തെ 70 മുതല്‍ 80 ശതമാനം വരെ ജനസംഖ്യയും നിയന്ത്രിക്കുന്ന ഹൂതി വിമതരും സൗദി പിന്തുണയുള്ള യെമന്‍ സര്‍ക്കാരും തമ്മിലുണ്ടായിരുന്ന വെടിനിര്‍ത്തല്‍ കരാര്‍ ഈ വര്‍ഷം ആദ്യം തകര്‍ന്നതോടെയാണ് സംഘര്‍ഷം വീണ്ടും വഷളായത്.
ഇതിന് പിന്നാലെ സൗദി അറേബ്യ യെമനിലെ തങ്ങളുടെ സൈനിക ഇടപെടലുകള്‍ ശക്തമാക്കി. യെമനില്‍ സഖ്യസേനയും ഹൂതികളും തമ്മിലുള്ള പോരാട്ടം കൂടുതല്‍ രൂക്ഷമാകുന്ന സാഹചര്യമാണ് നിലവിലുള്ളത്. തലസ്ഥാനമായ സന്‍ആയിലെ എണ്ണ സംരക്ഷണ കേന്ദ്രത്തിന് നേരെ സൗദി വ്യോമാക്രമണം നടത്തി. പ്രദേശവാസികള്‍ സുരക്ഷിതമായി ഒഴിഞ്ഞുപോകാന്‍ സഖ്യസേന മുന്നറിയിപ്പ് നല്‍കിയതിന് പിന്നാലെയായിരുന്നു ഈ ആക്രമണം.
