ആലപ്പുഴയിലെ ബിജെപി നേതാവിന്റെ കൊലപാതകം; കൃത്യത്തിൽ നേരിട്ട് പങ്കെടുത്ത രണ്ട് പേര്‍ കൂടി പിടിയില്‍; ഇനി കണ്ടെത്താനുള്ളത് എട്ട് പേരെ

കൊച്ചി: ബിജെപി നേതാവ് രഞ്ജിത് ശ്രീനിവാസന്റെ കൊലപാതകത്തിൽ (Ranjit Srinivasan Murder) രണ്ടുപേർ കൂടി പിടിയിൽ. കൊലപാതകത്തിൽ നേരിട്ട് പങ്കെടുത്ത രണ്ട് പേരെയാണ് പിടിച്ചത്. ഇവരെ സംബന്ധിച്ചുള്ള കൂടുതല്‍ വിവരങ്ങള്‍ പോലീസ് പുറത്ത് വിട്ടിട്ടില്ല. പെരുമ്പാവൂരില്‍ നിന്നാണ് പ്രതികള്‍ പിടിയിലായത്.ഇവരുടെ അറസ്റ്റ് ഇന്നോ നാളെയോ രേഖപ്പെടുത്തും എന്നാണ് വിവരം.

അതേസമയം രഞ്ജിത് ശ്രീനിവാസന്‍ കൊല ചെയ്യപ്പെട്ടിട്ട് നാളെ രണ്ടാഴ്ച തികയുന്ന വേളയിലാണ് രണ്ട് പ്രതികളെ കൂടി പോലീസ് പിടിച്ചിരിക്കുന്നത്. പ്രതികളെ ഇപ്പോള്‍ ചോദ്യം ചെയ്ത് വരികയാണ്. കേസില്‍ എട്ട് പേർ കൂടി ഇനി പിടിയിലാകാനുണ്ട്. നാല് പേര്‍ മാത്രമാണ് ഇതുവരെ പിടിയിലായിട്ടുള്ളത്. പന്ത്രണ്ട് പേരാണ് കൃത്യത്തില്‍ നേരിട്ട് പങ്കെടുത്തത്.