ജുറാസിക് വേള്‍ഡിലെ സഹനടിയായ വരദ സേതു ഉണ്ണി ഉണ്ണിമുകുന്ദന്റെ പുതിയ ചിത്രത്തിലെ നായികയാകുന്നു. ജയരാജ് സംവിധാനം ചെയ്യുന്ന പ്രമദവനത്തിലാണ് ബ്രിട്ടിഷ് മലയാളിയായ വരദ നായികയായി എത്തുന്നത്. നൗ യു സീ മി2, സ്‌ട്രൈക്ക്, സമ്മര്‍ നൈറ്റ് ഡ്രീം തുടങ്ങിയ ഹോളിവുഡ് ചിത്രങ്ങളുടെ ഭാഗമായിരുന്നു വരദ.
ജുറാസിക് വേള്‍ഡ് പ്രദര്‍ശനത്തിന് എത്തിയതിന് പിന്നാലെ ഉണ്ണി മുകുന്ദന്‍, കൈലാഷ് അടക്കമുള്ള താരങ്ങള്‍ വരദയെ അഭിനന്ദിച്ച്‌ എത്തി. നിരവധി ഹോളിവുഡ് സിനിമകളില്‍ അഭിനയിച്ച്‌ വരദ നേരത്തെ മലയാള സിനിമയില്‍ അരങ്ങേറ്റം കുറിച്ചിരുന്നു. നിവിന്‍ പോളി കേന്ദ്ര കഥാപാത്രമായെത്തിയ ഇംഗ്ലീഷ് എന്ന ചിത്രത്തിലാണ് വരദ നേരത്തെ പ്രത്യക്ഷപ്പെട്ടത്. മേഘ്‌ന എന്ന കഥാപാത്രത്തെയാണ് വരദ ചിത്രത്തില്‍ അവതരിപ്പിച്ചത്.
ബ്രിട്ടനില്‍ സ്ഥിരതാമസമാക്കിയ മലയാളികളായ ഡോക്ടര്‍ ദമ്പതികളുടെ ഇരട്ടക്കുട്ടികളില്‍ ഒരാളാണ് വരദ സേതു. ചെറുപ്പം മുതല്‍ തന്നെ ഭരതനാട്യവും മോഹിനിയാട്ടവും പരിശീലിച്ച വരദ 2010 ലെ മിസ്സ് ന്യൂകാസില്‍ മത്സരത്തില്‍ വിജയിച്ചിട്ടുണ്ട്. വെറ്ററിനറി മെഡിസിനില്‍ ബിരുദ ദാരിയാണ് വരദ. ബിബിസി പ്രക്ഷേപണം ചെയ്യുന്ന ഹാര്‍ഡ് സണ്‍ എന്ന ക്രൈം സീരിസിലെ ഡി എസ് മിഷല്‍ അലി എന്ന കഥാപത്രം ചെയ്തതിലൂടെയാണ് വരദ ശ്രദ്ധിക്കപ്പെട്ടത്.
