വയനാട്: മുനമ്പം ഒറ്റപ്പെട്ടതാണെന്നും കേരളത്തിൽ ആവർത്തിക്കില്ലെന്നും ലീഗ് നേതാക്കളടക്കം ആണയിടുമ്പോഴും വീണ്ടും വഖഫ് അവകാശവാദം. മാനന്തവാടിയിലാണ് 5.45 ഏക്കർ ഭൂമിയിൽ വഖഫ് ബോർഡ് അവകാശവാദം ഉന്നയിച്ചിരിക്കുന്നത്. തവിഞ്ഞാൽ പഞ്ചായത്തിലെ തലപ്പുഴ വാർഡിൽ താമസിക്കുന്ന 8 കുടുംബങ്ങൾക്കാണ് നോട്ടീസ് ലഭിച്ചിരിക്കുന്നത്. ഈ മാസം 14 നു മുമ്പ് രേഖകൾ ഹാജരാക്കണമെന്നും 19 നകം അദാലത്തിൽ പങ്കെടുക്കണമെന്നുമാണ് നോട്ടീസ് ലഭിച്ചിരിക്കുന്നത്. നിലവിൽ 8 കുടുംബങ്ങൾക്കാണ് നോട്ടീസ് ലഭിച്ചിരിക്കുന്നതെങ്കിലും 20 കുടുംബങ്ങൾക്ക് കുടിയിറക്കൽ ഭീഷണിയുണ്ട്. അദാലത്തിൽ പങ്കെടുത്തില്ലെങ്കിൽ ഭൂമി വഖഫായി പ്രഖ്യാപിച്ച് ഏകപക്ഷീയമായ വിധിയുണ്ടാകുമെന്നാണ് നോട്ടീസിൽ പറയുന്നത്.
യാതൊരു രേഖയുമില്ലാതെയാണ് വഖഫ് ബോർഡ് ഭൂമിയിൽ അവകാശവാദം ഉന്നയിച്ചത്. സ്ഥലത്തെ ചില പ്രധാന കാരണവന്മാർ ഭൂമി വഖഫ് ആണെന്ന് ബോർഡിനെ അറിയിച്ചെന്നാണ് ന്യായീകരണം. തവിഞ്ഞാൽ ഹയാത്തുൽ ഇസ്‌ലാം ജമാഅത്താണ് ഭൂമിയിൽ അവകാശവാദം ഉന്നയിച്ചത്. തലപ്പുഴ വാർഡിലെ 47/ 1, 48/ 1 എന്നീ സർവ്വേ നമ്പറുകളിലുള്ള ഭൂമിയിലാണ് ഇപ്പോൾ അവകാശവാദം ഉന്നയിച്ചത്. മുനമ്പം വിഷയം ഒറ്റപ്പെട്ട സംഭവമാണെന്നും കേരളത്തിൽ മറ്റൊരിടത്തും ആവർത്തിക്കാൻ സാധ്യതയില്ലെന്നുമായിരുന്നു സർക്കാരിന്റെയും മുസ്ലിം ലീഗ് അടക്കമുള്ള രാഷ്ട്രീയ പാർട്ടികളും പറഞ്ഞിരുന്നത്. എന്നാൽ സമാനമായ വഖഫ് അധിനിവേശം കേരളം മൊത്തം വ്യാപിക്കുന്നു എന്നാണ് മാനന്തവാടി തെളിയിക്കുന്നത്. മാനന്തവാടി സബ് രജിസ്ട്രാർ ഓഫീസിലെ 1428 നമ്പർ ആധാരം പ്രകാരം ഭൂമി വഖഫ് ആണെന്നാണ് ബോർഡ് ആരോപിക്കുന്നത്. വഖഫ് ആക്ട് സെക്ഷൻ 54 പ്രകാരമാണ് നോട്ടീസ്.
