ചെന്നൈ: ലോകേഷ് കനകരാജ് സംവിധാനം ചെയ്ത ‘വിക്രം’ എന്ന ചിത്രത്തിലെ റോളക്സ് എന്ന കഥാപാത്രം സൂര്യയുടെ കരിയറിലെ ഏറ്റവും ശ്രദ്ധേയമായ അതിഥി വേഷങ്ങളിലൊന്നായിരുന്നു. ചിത്രത്തിന്റെ ക്ലൈമാക്സിൽ ഏതാനും നിമിഷങ്ങൾ മാത്രമാണ് സൂര്യ പ്രത്യക്ഷപ്പെട്ടതെങ്കിലും, കഥാപാത്രത്തിന് ലഭിച്ച സ്വീകാര്യതയെ തുടർന്ന് റോളക്സിനെ കേന്ദ്രകഥാപാത്രമാക്കി ഒരു സ്റ്റാൻഡ് എലോൺ സിനിമ ഒരുക്കുമെന്ന് ലോകേഷ് കനകരാജ് പ്രഖ്യാപിച്ചിരുന്നു. എന്നാൽ അതിനുശേഷം പദ്ധതിയെക്കുറിച്ചുള്ള ഔദ്യോഗിക വിവരങ്ങളൊന്നും പുറത്തുവന്നിരുന്നില്ല.
ഇപ്പോഴിതാ, ദ ഹോളിവുഡ് റിപ്പോർട്ടർ ഇന്ത്യയ്ക്ക് നൽകിയ അഭിമുഖത്തിൽ റോളക്സ് സിനിമയുടെ പുരോഗതിയെക്കുറിച്ച് സൂര്യ പ്രതികരിച്ചു. സിനിമയുടെ ചിത്രീകരണം എപ്പോൾ ആരംഭിക്കുമെന്ന കാര്യത്തിൽ തനിക്ക് വ്യക്തതയില്ലെന്നാണ് താരം പറയുന്നത്.
“ലോകേഷ് ഇപ്പോൾ എന്താണ് ചെയ്യുന്നതെന്ന് എനിക്കറിയില്ല. അദ്ദേഹം ഇപ്പോൾ അല്ലു അർജുന്റെ ചിത്രത്തിന്റെ തിരക്കിലാണ്. ‘വിക്രം 2’ എന്ന പദ്ധതിയും മുന്നിലുണ്ട്. എന്നാൽ അഭിമുഖങ്ങളിൽ റോളക്സ് സിനിമയുടെ തിരക്കഥ തയ്യാറാക്കുകയാണെന്ന് അദ്ദേഹം പറയുന്നത് കേൾക്കാറുണ്ട്. ബാക്കി കാര്യങ്ങൾ സമയം തീരുമാനിക്കട്ടെ,” എന്നാണ് സൂര്യയുടെ പ്രതികരണം.
കമൽ ഹാസനെ നായകനാക്കി ലോകേഷ് കനകരാജ് സംവിധാനം ചെയ്ത ‘വിക്രം’ 2022-ൽ പുറത്തിറങ്ങി വമ്പൻ വിജയമായിരുന്നു. ഫഹദ് ഫാസിലും വിജയ് സേതുപതിയും പ്രധാന കഥാപാത്രങ്ങളെ അവതരിപ്പിച്ച ചിത്രം ആഗോളതലത്തിൽ 400 കോടിയിലധികം ഗ്രോസ് കളക്ഷൻ സ്വന്തമാക്കി. കേരളത്തിലും മികച്ച പ്രകടനം കാഴ്ചവെച്ച ചിത്രം ഏകദേശം 50 കോടിയോളം കളക്ഷൻ നേടിയിരുന്നു. ലോകേഷ് സിനിമാറ്റിക് യൂണിവേഴ്സിന്റെ (LCU) നിർണായക തുടക്കമായും ‘വിക്രം’ ശ്രദ്ധിക്കപ്പെട്ടു.
റോളക്സ് കഥാപാത്രത്തെ കേന്ദ്രമാക്കി ഒരുങ്ങുന്ന സ്റ്റാൻഡ് എലോൺ ചിത്രത്തിനായുള്ള ഔദ്യോഗിക പ്രഖ്യാപനവും തുടർ അപ്ഡേറ്റുകളും സിനിമാപ്രേമികൾ പ്രതീക്ഷയോടെയാണ് കാത്തിരിക്കുന്നത്.
