ദില്ലി : റേഷൻ കാർഡ് ഉടമകൾക്കു രാജ്യത്തെ ഏതു റേഷൻ കടയിൽ നിന്നും ഭക്ഷ്യധാന്യങ്ങൾ വാങ്ങാനാകുന്ന ‘ഒരു രാജ്യം ഒരു റേഷന്‍ കാര്‍ഡ്’ പദ്ധതി നടപ്പാക്കാനൊരുങ്ങി കേന്ദ്രസർക്കാർ.
കേന്ദ്ര ഭക്ഷ്യ പൊതുവിതരണ മന്ത്രി രാം വിലാസ് പാസ്വാൻ്റെ അധ്യക്ഷതയില്‍ വ്യാഴാഴ്ച ചേര്‍ന്ന യോഗത്തിനുശേഷമാണ് വിപ്ലവകരമായ പദ്ധതി പ്രഖ്യാപിച്ചത്.
കുടിയേറ്റ തൊഴിലാളികൾക്കും സ്ഥലം മാറിപ്പോകുന്ന പാവപ്പെട്ടവർക്കും സഹായകരമാകും വിധമാണ് പദ്ധതി രൂപീകരിക്കുക. കിടപ്പാടം മാറി മറ്റ് സ്ഥലങ്ങളിലേക്ക് പോകുന്ന ദരിദ്രർക്ക് ഭക്ഷ്യസുരക്ഷാ പദ്ധതി പ്രകാരമുള്ള സബ്‌സിഡി ഭക്ഷ്യധാന്യങ്ങള്‍ ലഭിക്കുന്നുണ്ടെന്ന് ഉറപ്പ് വരുത്തുന്ന വിധത്തിലാണ് പദ്ധതിയുടെ വിഭാവനം.
പദ്ധതി സംബന്ധിച്ച തീരുമാനങ്ങളെടുക്കാൻ ചേർന്ന യോഗത്തിൽ എല്ലാ സംസ്ഥാനങ്ങളിലെയും ഭക്ഷ്യ സെക്രട്ടറിമാർ പങ്കെടുത്തു.
ഫുഡ് കോര്‍പ്പറേഷന്‍ ഓഫ് ഇന്ത്യ, സെന്‍ട്രല്‍ വെയര്‍ഹൗസിംഗ് കോ-ഓപ്പറേഷന്‍, സ്റ്റേറ്റ് വെയര്‍ഹൗസിംഗ് കോര്‍പ്പറേഷന്‍സ്പ്രതിനിധികളും യോഗത്തില്‍ പങ്കെടുത്തു. ഒരു വര്‍ഷത്തിനകം പദ്ധതിയുടെ എല്ലാ നടപടിക്രമങ്ങളും പൂര്‍ത്തിയാക്കും.
പല സംസ്ഥാനങ്ങളിലായി ഒന്നില്‍ കൂടുതല്‍ റേഷന്‍ കാര്‍ഡുകള്‍ ഉപയോഗിച്ച് ആനൂകൂല്യങ്ങള്‍ നേടുന്നത് തടയാൻ പുതിയ പദ്ധതി സഹായിക്കും. കുടിയേറ്റ തൊഴിലാളികളാകും പദ്ധതിയുടെ ഏറ്റവും വലിയ ഗുണഭോക്താക്കളെന്നും കേന്ദ്ര മന്ത്രി രാംവിലാസ് പാസ്വാന്‍ പറഞ്ഞു. കുടിയേറ്റ തൊഴിലാളികൾക്ക് പൂര്‍ണ്ണ ഭക്ഷ്യസുരക്ഷ ഉറപ്പാക്കും. ഏത് പൊതുവിതരണ കേന്ദ്രം തിരഞ്ഞെടുക്കണമെന്ന് ഗുണഭോക്താവിന് സ്വാതന്ത്ര്യമുണ്ടാകുമെന്നും അദ്ദേഹം പറഞ്ഞു.
