ഭുവനേശ്വർ: ഒഡീഷ ബാലസോറിന് സമീപത്തുണ്ടായ മുന്നൂറിലധികം പേരുടെ ജീവൻ പൊലിയാൻ കാരണമായ ട്രെയിൻ അപകടത്തിൽപ്പെട്ട് പരിക്കേറ്റവരിൽ മലയാളികളും. അന്തിക്കാട് സ്വദേശികളായ കിരൺ, വിജേഷ്, വൈശാഖ്, രഘു, എന്നിവർക്കാണ് പരിക്കേറ്റത്. ഒരു ക്ഷേത്രത്തിന്റെ നിർമ്മാണവുമായി ബന്ധപ്പെട്ടുള്ള ജോലികൾക്ക് വേണ്ടി കൊൽക്കത്തയിൽ പോയി തിരിച്ചു വരുന്നതിനിടയിലാണ് സംഘം ട്രെയിൻ അപകടത്തിൽപ്പെട്ടത്.
നിലവിൽ ഇവരുടെ പരിക്ക് സാരമുള്ളതല്ലെന്നാണ് വിവരം. കോറമണ്ഡൽ ട്രെയിനിലെ സ്ലീപ്പർ കമ്പാട്ടുമെന്റിൽ നിന്ന് യാത്ര ചെയ്യുകയായിരുന്നുവെന്നും പെട്ടന്നാണ് അപകടമുണ്ടായതെന്നും എമർജൻസി എക്സിറ്റ് വഴിയാണ് പുറത്തേക്കിറങ്ങിയതെന്നും കിരൺ പറഞ്ഞു. കമ്പാട്ടുമെന്റിൽ ഒപ്പം യാത്ര ചെയ്യുകയായിരുന്ന ആളുകൾ അപകടത്തിൽ മരിച്ചു. പരിക്കേറ്റവരിൽ മൂന്ന് പേരെ പുറത്തേക്ക് എത്തിച്ച ശേഷമാണ് ഞങ്ങൾ രക്ഷപ്പെട്ടതെന്നും കിരൺ പ്രതികരിച്ചു.
അതേസമയം ട്രെയിനുകള് കൂട്ടിയിടിച്ചുണ്ടായ അപകടത്തിൽ 233 പേർ മരിച്ചതായാണ് റിപ്പോട്ട്. ആയിരത്തിലധികം പേർക്ക് പരിക്കേറ്റിട്ടുണ്ട്.ഷാലിമറില്നിന്ന് ചെന്നൈയിലേക്കു പോവുകയായിരുന്ന കൊല്ക്കത്ത ചെന്നൈ കോറമണ്ഡല് എക്സ്പ്രസും ബെംഗളൂരുവില്നിന്ന് ഹൗറയിലേക്ക് പോവുകയായിരുന്ന ഹൗറ സൂപ്പര്ഫാസ്റ്റ് എക്സ്പ്രസുമാണ് കൂട്ടിയിടിച്ചത്. ഇക്കാര്യത്തില് റെയില്വേയുടെ വിശദീകരണം ഇതുവരെ വന്നിട്ടില്ല.
പാളം തെറ്റിയാണ് അപകടമുണ്ടായത്. കോറമണ്ഡല് എക്സ്പ്രസും ഗുഡ്സ് ട്രെയിനും കൂട്ടിയിടിച്ചെന്നായിരുന്നു ആദ്യ റിപ്പോര്ട്ടുകള്. രക്ഷപ്പെടുത്തിയവരെ വിവിധ ആശുപത്രികളില് പ്രവേശിപ്പിച്ചതായി ഒഡീഷ ചീഫ് സെക്രട്ടറി അറിയിച്ചു. ഇവരില് പലരുടെയും നില ഗുരുതരമാണ്. ഇനിയും മരണസംഖ്യ കൂടിയേക്കാമെന്നാണ് റിപ്പോർട്ടുകൾ.
