ലഖ്‌നൗ: ഉത്തർപ്രദേശിൽ വ്യാപകമായി മതപരിവർത്തനം നടത്തിവന്ന സംഘത്തിലെ മുഖ്യ ആസൂത്രകൻ ജലാലുദ്ദീൻ എന്ന ‘ചങ്കൂർ ബാബ’യെയും സഹായിയെയും ഭീകരവിരുദ്ധ സേന (ATS) അറസ്റ്റ് ചെയ്തു. ബൽറാംപൂർ സ്വദേശിയായ ജലാലുദ്ദീൻ, ഇയാളുടെ സഹായി നീതു എന്ന നസ്രീൻ എന്നിവരാണ് പിടിയിലായത്.
ഒളിവിലായിരുന്ന ജലാലുദ്ദീനെ കണ്ടെത്താൻ സഹായിക്കുന്നവർക്ക് പോലീസ് 50,000 രൂപ പാരിതോഷികം പ്രഖ്യാപിച്ചിരുന്നു. കോടതി പുറപ്പെടുവിച്ച ജാമ്യമില്ലാ വാറന്റിനെത്തുടർന്ന് എടിഎസ് നടത്തിയ നീക്കത്തിനൊടുവിലാണ് ഇവർ വലയിലായത്. പ്രതികളെ ലഖ്‌നൗ ജില്ലാ ജയിലിലേക്ക് മാറ്റി.
പണം നൽകിയും വിവാഹവാഗ്ദാനങ്ങൾ നൽകിയും ആളുകളെ പ്രലോഭിപ്പിച്ചാണ് ഇവർ മതം മാറ്റിയിരുന്നത്. പ്രലോഭനങ്ങൾക്ക് വഴങ്ങാത്തവരെ ഭീഷണിപ്പെടുത്തിയും ഉപദ്രവിച്ചും മതം മാറ്റാൻ ശ്രമിച്ചിരുന്നതായി എടിഎസ് പുറത്തിറക്കിയ പ്രസ്താവനയിൽ വ്യക്തമാക്കുന്നു. ലഖ്‌നൗ ഗോമതിനഗർ പോലീസ് സ്റ്റേഷനിൽ രജിസ്റ്റർ ചെയ്ത കേസിലാണ് നിലവിലെ അറസ്റ്റ്.
ഈ കേസുമായി ബന്ധപ്പെട്ട് നേരത്തെ ഏപ്രിൽ എട്ടിന് ജലാലുദ്ദീന്റെ മകൻ മെഹബൂബ്, സഹായി നവീൻ എന്ന ജമാലുദ്ദീൻ എന്നിവരെ പോലീസ് അറസ്റ്റ് ചെയ്തിരുന്നു. ഇവരെ ചോദ്യം ചെയ്തതിൽ നിന്ന് ലഭിച്ച നിർണ്ണായക വിവരങ്ങളാണ് മുഖ്യസൂത്രധാരനായ ചങ്കൂർ ബാബയെ പിടികൂടാൻ എടിഎസിനെ സഹായിച്ചത്.
