കേരളം സമീപകാലത്തെ ഏറ്റവും രൂക്ഷമായ വൈദ്യുതി ക്ഷാമത്തിലൂടെയാണ് കടന്നുപോകുന്നത്. വൻതോതിൽ ഉയർന്ന അന്തരീക്ഷ താപനിലയും രാത്രികാലങ്ങളിലെ എയർ കണ്ടീഷണറുകളുടെ അമിത ഉപയോഗവും കാരണം പ്രതിദിന ആവശ്യകത 5,000 മെഗാവാട്ടിനും മുകളിലേക്ക് ഉയർന്നു. എന്നാൽ സംസ്ഥാനത്ത് ലഭ്യമായ വൈദ്യുതിയിൽ 700 മുതൽ 900 മെഗാവാട്ട് വരെ കുറവ് നേരിടുന്നതിനാൽ രാത്രികാലങ്ങളിൽ താൽക്കാലിക വിതരണ നിയന്ത്രണങ്ങൾ ഏർപ്പെടുത്താൻ KSEB നിർബന്ധിതരായിരിക്കുകയാണ്.
കുറഞ്ഞ മഴ കാരണം ആഭ്യന്തര ജലവൈദ്യുത പദ്ധതികളിലെ ഉത്പാദനം പരിമിതപ്പെടുത്തിയതും ദേശീയ പവർ എക്സ്ചേഞ്ചുകളിൽ ആവശ്യത്തിന് വൈദ്യുതി ലഭ്യമാകാത്തതുമാണ് പ്രതിസന്ധി രൂക്ഷമാക്കിയത്.പകൽ സമയങ്ങളിൽ സോളാർ ഊർജ്ജം ഉത്പാദിപ്പിക്കപ്പെടുന്നുണ്ടെങ്കിലും രാത്രിയിലെ ഉയർന്ന ആവശ്യകത പരിഹരിക്കാൻ ആവശ്യമായ ബാറ്ററി സ്റ്റോറേജ് സംവിധാനങ്ങൾ നിലവിൽ ലഭ്യമല്ല. മറ്റ് സംസ്ഥാനങ്ങളിൽ നിന്നും കേന്ദ്ര പൂളിൽ നിന്നും അധിക വൈദ്യുതി വാങ്ങാനുള്ള ചർച്ചകൾ കെഎസ്ഇബി ഊർജ്ജിതമാക്കിയിട്ടുണ്ട്.
രാത്രി വൈകിയുള്ള വൈദ്യുതി ഉപയോഗം പരമാവധി കുറച്ച് സഹകരിക്കണമെന്ന് അധികൃതർ പൊതുജനങ്ങളോട് അഭ്യർത്ഥിച്ചു. വരും ദിവസങ്ങളിൽ ഉത്തരേന്ത്യയിലെ താപനില കുറയുകയും മറ്റ് വഴികളിലൂടെ വൈദ്യുതി ലഭ്യത ഉറപ്പാക്കുകയും ചെയ്യുന്നതോടെ സെപ്റ്റംബർ അവസാനത്തോടെ പ്രതിസന്ധിക്ക് ആശ്വാസമാകുമെന്നാണ് പ്രതീക്ഷിക്കുന്നത്.
