
സംസ്ഥാനത്തെ ജയിലുകളിൽ ക്രിമിനൽ കേസുകളിൽ ശിക്ഷിക്കപ്പെട്ട് കഴിയുന്ന തടവുകാർക്ക് ഇനി മുതൽ ആഡംബര ഭക്ഷണത്തിന് നിയന്ത്രണം. തടവുകാരുടെ ഭക്ഷണക്രമത്തിൽ വലിയ മാറ്റങ്ങൾ നിർദ്ദേശിച്ച് സംസ്ഥാന ജയിൽ വകുപ്പ്. ഇതുവരെ നൽകി വന്നിരുന്ന മട്ടനും (ആട്ടിറച്ചി) മീനും പൂർണ്ണമായും ഒഴിവാക്കി, പകരം ചിക്കനും സോയയും മുട്ടയും നൽകാനാണ് ജയിൽ മേധാവി എസ്. ശ്രീജിത്ത് ആഭ്യന്തര വകുപ്പിന് നൽകിയ റിപ്പോർട്ടിൽ ശുപാർശ ചെയ്തിരിക്കുന്നത്. സാധാരണക്കാർ നിത്യച്ചെലവുകൾക്കായി ബുദ്ധിമുട്ടുമ്പോൾ, ക്രിമിനലുകൾക്ക് നികുതിപ്പണം ഉപയോഗിച്ച് ജയിലിൽ ആഡംബര ഭക്ഷണം നൽകുന്നതിനെതിരെ കാലങ്ങളായി വലിയ വിമർശനം നിലനിൽക്കുന്നുണ്ട്. ഈ സാഹചര്യത്തിൽ പുതിയ തീരുമാനം സംസ്ഥാന ഖജനാവിന് വലിയ ആശ്വാസമാകും. പുതിയ മെനുവിലൂടെ പ്രതിവർഷം 5.7 കോടി രൂപയുടെ ലാഭമാണ് ജയിൽ വകുപ്പ് ലക്ഷ്യമിടുന്നത്.
ജയിൽ വകുപ്പിന്റെ കണക്കുകൾ പ്രകാരം, നിലവിൽ തടവുകാർക്ക് മട്ടൻ നൽകുന്നതിനായി മാത്രം വർഷം തോറും 5.72 കോടി രൂപയാണ് സർക്കാർ ഖജനാവിൽ നിന്ന് ചെലവാക്കുന്നത്. ഇതിന് പുറമെ മീൻ വാങ്ങുന്നതിനായി 4.8 കോടി രൂപയും ചെലവിടുന്നു. അതായത് തടവുകാരുടെ മാംസാഹാരത്തിനായി മാത്രം പ്രതിവർഷം പത്ത് കോടിയിലധികം രൂപ! എന്നാൽ പുതിയ നിർദ്ദേശം നടപ്പിലാക്കുന്നതോടെ വലിയ സാമ്പത്തിക ലാഭമാണ് ഉണ്ടാകുക. കോടികൾ വിലയുള്ള മട്ടനും മീനും ഒഴിവാക്കി പകരം ചിക്കൻ ഉൾപ്പെടുത്തുമ്പോൾ അതിന് പ്രതിവർഷം 1.26 കോടി രൂപ മാത്രമേ ചിലവാകൂ. സോയ ചങ്ക്സ്, മുട്ട എന്നിവയ്ക്കായി 3.4 കോടി രൂപയും മതിയാകും. സംസ്ഥാനം കടുത്ത സാമ്പത്തിക പ്രതിസന്ധിയിലൂടെ കടന്നുപോകുമ്പോൾ, നികുതിദായകരുടെ പണം ക്രിമിനലുകളെ തീറ്റിപ്പോറ്റാൻ ഇത്രയധികം ദുർവിനിയോഗം ചെയ്യപ്പെട്ടിരുന്നു എന്ന ഞെട്ടിക്കുന്ന യാഥാർത്ഥ്യമാണ് ഈ കണക്കുകൾ വ്യക്തമാക്കുന്നത്. സാമ്പത്തിക ലാഭത്തിന് പുറമെ ആരോഗ്യപരമായ കാരണങ്ങളും ജയിൽ വകുപ്പ് ചൂണ്ടിക്കാണിക്കുന്നുണ്ട്. സ്ഥിരമായി മട്ടൻ കഴിക്കുന്നത് ഹൃദ്രോഗം ഉൾപ്പെടെയുള്ള ജീവിതശൈലീ രോഗങ്ങൾക്ക് കാരണമാകുമെന്ന് വിലയിരുത്തപ്പെടുന്നു. കൂടാതെ, ഇത്രയധികം ആളുകൾക്കുള്ള മട്ടനും മീനും കേടുകൂടാതെ സൂക്ഷിക്കുന്നതിലും വിതരണം ചെയ്യുന്നതിലുമുള്ള പ്രായോഗിക ബുദ്ധിമുട്ടുകളും ഈ മാറ്റത്തിന് കാരണമായിട്ടുണ്ട്.
പുതിയ തീരുമാനത്തെ വലിയ ആശ്വാസത്തോടെയാണ് സാധാരണ ജനങ്ങൾ നോക്കിക്കാണുന്നത്. വിലക്കയറ്റവും സാമ്പത്തിക ബുദ്ധിമുട്ടുകളും കാരണം സാധാരണക്കാരനായ ഒരു കൂലിപ്പണിക്കാരൻ മാസത്തിൽ ഒരിക്കൽ പോലും കുടുംബത്തിന് മട്ടൻ വാങ്ങിക്കൊടുക്കാൻ പാടുപെടുമ്പോഴാണ്, കൊലപാതകവും മോഷണവും ഉൾപ്പെടെയുള്ള കുറ്റകൃത്യങ്ങൾ ചെയ്തവർക്ക് സർക്കാർ ചെലവിൽ കൃത്യമായി മട്ടൻ വിളമ്പിയിരുന്നത്. ജയിലുകൾ കുറ്റവാളികളെ തിരുത്താനുള്ള ഇടങ്ങളാണ്, അല്ലാതെ അവർക്ക് വിശ്രമിക്കാനും ആഡംബര ഭക്ഷണം കഴിക്കാനുമുള്ള റിസോർട്ടുകളല്ലെന്നും, നമ്മൾ അടയ്ക്കുന്ന നികുതിപ്പണം ഉപയോഗിച്ച് ക്രിമിനലുകൾക്ക് നൽകുന്ന ഈ സൗജന്യങ്ങൾ അവസാനിപ്പിക്കേണ്ടത് തന്നെയാണെന്നുമാണ് പൊതുവികാരം. കുറ്റകൃത്യങ്ങൾ കുറയാൻ ശിക്ഷാനടപടികൾ കർശനമാകേണ്ടതുണ്ട്. ജയിലിലെ സൗകര്യങ്ങൾ പരിധിവിടുമ്പോൾ അത് കുറ്റവാളികളിൽ നിയമത്തോടുള്ള ഭയം ഇല്ലാതാക്കാനേ ഉപകരിക്കൂ. പുതിയ തീരുമാനത്തിലൂടെ, തെറ്റ് ചെയ്താൽ ലഭിക്കുന്നത് ശിക്ഷയാണെന്ന സന്ദേശം പൊതുസമൂഹത്തിന് നൽകാനും, അനാവശ്യ ധൂർത്ത് അവസാനിപ്പിക്കാനും സാധിക്കുമെന്നാണ് വിലയിരുത്തപ്പെടുന്നത്. നിർദ്ദേശം ഇപ്പോൾ ആഭ്യന്തര വകുപ്പിന്റെ അന്തിമ അംഗീകാരത്തിനായി കാത്തിരിക്കുകയാണ്.

