ഐപിഎല്ലിലെ ചെന്നൈ സൂപ്പർ കിങ്സിന്റെ ചരിത്രത്തിൽ നിർണായക അധ്യായങ്ങൾ എഴുതിച്ചേർത്ത എം.എസ്. ധോണി ഇനി പുതിയ റോളിലേക്ക്. താരമെന്ന നിലയിൽ മഞ്ഞപ്പടയ്ക്കായി കളിച്ചിരുന്ന ധോണി അടുത്ത സീസൺ മുതൽ മെന്റർ റോളിൽ ടീമിനൊപ്പം തുടരുമെന്നാണ് റിപ്പോർട്ടുകൾ. രണ്ട് പതിറ്റാണ്ടോളം നീണ്ട ഐപിഎൽ കരിയറിന് ഇതോടെ പുതിയൊരു വഴിത്തിരിവാകുകയാണ്.
2008ൽ ഐപിഎല്ലിന്റെ ആദ്യ സീസൺ മുതൽ ചെന്നൈ സൂപ്പർ കിങ്സിന്റെ മുഖമായി മാറിയ ധോണി, അഞ്ച് തവണ ടീമിനെ കിരീടത്തിലേക്ക് നയിച്ച നായകനാണ്. രണ്ട് ചാമ്പ്യൻസ് ലീഗ് ടി20 കിരീടങ്ങളും ധോണിയുടെ നേതൃത്വത്തിൽ ചെന്നൈ സ്വന്തമാക്കി. 2026 സീസണിൽ പരിക്ക് കാരണം ഒരു മത്സരത്തിൽ പോലും കളിക്കാനാകാതിരുന്ന താരം, ഐപിഎല്ലിലെ തന്റെ കളിക്കാരൻ എന്ന നിലയിലുള്ള യാത്ര അവസാനിപ്പിക്കുകയാണ്.
എന്നാൽ മഞ്ഞപ്പടയുമായുള്ള ബന്ധത്തിന് ഇതോടെ അവസാനമാകുന്നില്ല. 2027 ഐപിഎൽ സീസൺ മുതൽ ടീം മെന്ററായി ധോണി ചുമതലയേൽക്കും. ടീമിലെ യുവതാരങ്ങൾക്ക് മാർഗനിർദേശം നൽകുന്നതിനൊപ്പം ടീം രൂപീകരണത്തിലും തന്ത്രപരമായ തീരുമാനങ്ങളിലും ധോണിയുടെ അനുഭവസമ്പത്ത് പ്രയോജനപ്പെടുത്താനാണ് ചെന്നൈ സൂപ്പർ കിങ്സിന്റെ നീക്കം. കളിക്കളത്തിലെ നായകസ്ഥാനത്തുനിന്ന് പിന്നണിയിലെ നിർണായക റോളിലേക്ക് മാറുമ്പോഴും ‘തല’യുടെ സാന്നിധ്യം മഞ്ഞപ്പടയ്ക്കൊപ്പം തുടരും.

