കൊച്ചി: കൊച്ചി ശാസ്ത്ര സാങ്കേതിക സർവകലാശാലയിൽ (കുസാറ്റ്) നടന്ന ടെക് ഫെസ്റ്റലുണ്ടായ തിക്കിലും തിരക്കിലും പെട്ട് നാല് വിദ്യാർത്ഥികൾ മരിച്ചു. പരിക്കേറ്റ 46 വിദ്യാർത്ഥികളെ കളമശ്ശേരി മെഡിക്കൽ കോളേജിൽ പ്രവേശിപ്പിച്ചു. മെക്കാനിക്കൽ വിഭാഗം സംഘടിപ്പിച്ച ഫെസ്റ്റിന്റെ ഭാഗമായി പ്രശസ്ത ബോളിവുഡ് ഗായിക നിഖിത ഗാന്ധിയുടെ ഗാനസന്ധ്യ ഓഡിറ്റോറിയത്തിൽ നടക്കുന്നതിനിടെയാണ് അപകടമുണ്ടായത്. വൈകുന്നേരം ഏഴ് മണിയോടെയായിരുന്നു സംഭവം. മഴ പെയ്തതോടെ കൂടുതൽ പേർ ഓഡിറ്റോറിയത്തിലേക്ക് തള്ളിക്കയറിയത് അപകടത്തിന് കാരണമാകുകയായിരുന്നു.
കഴിഞ്ഞ ദിവസമാണ് കുസാറ്റിൽ ധിഷ്ണ എന്ന പേരിൽ ടെക് ഫെസ്റ്റ് ആരംഭിച്ചത്. ഇതോടനുബന്ധിച്ച് ഇന്ന് വൈകുന്നേരം ആറുമണിക്കാണ് നിഖിത ഗാന്ധിയുടെ ഗാനസന്ധ്യ തുടങ്ങിയത്. ഓഡിറ്റോറിയത്തിൽ ഉൾക്കൊള്ളാവുന്നതിലും കൂടുതൽ ആളുകൾ രാവിലെ മുതൽ ഇവിടേയ്ക്ക് എത്തിയിരുന്നു.
