ഹൈദരാബാദ്: യുവ താരദമ്പതികളിൽ ഏറെ പ്രമുഖരായ നാഗചൈതന്യയും സാമന്തയും വിവാഹമോചിതരാകുന്നെന്ന വാർത്ത വലിയ ഞെട്ടലോടെയാണ് ആരാധകർ കേട്ടത്. എന്നാൽ നാളുകളായുള്ള സമൂഹ മാധ്യമങ്ങളിലെ ചർച്ചകൾക്ക് വിരാമമിട്ടുകൊണ്ട് വിവാഹമോചന വാര്‍ത്ത ഔദ്യോഗികമായി അറിയിച്ചിരിക്കുകയാണ് സാമന്തയും നാഗചൈതന്യയും. ഇരു താരങ്ങളും സംയുക്തമായി തയ്യാറാക്കിയ കുറിപ്പ് സമൂഹമാദ്ധ്യമങ്ങളില്‍ പങ്കുവച്ചതോടെയാണ് അഭ്യൂഹങ്ങള്‍ സത്യമായിരുന്നുവെന്ന് തെളിഞ്ഞത്.
“തങ്ങൾ ജീവിത പങ്കാളികൾ എന്ന നിലയിൽ നിന്നും വേര്‍പിരിയുകയാണെന്നും, പത്ത് വര്‍ഷത്തിലധികമായുള്ള സൗഹൃദം തങ്ങളുടെ ജീവതത്തിന് വളരെയധികം പ്രാധാന്യം നല്‍കിയിരുന്നെന്നും, എക്കാലവും അതുണ്ടാവുമെന്ന് വിശ്വസിക്കുന്നുമെന്നും താരങ്ങള്‍ പങ്കുവെച്ച കുറിപ്പില്‍ പറയുന്നു. എല്ലാവരുടേയും പിന്തുണ വേണമെന്നും ഇരുവരും ആവശ്യപ്പെടുന്നുണ്ട്.”
കഴിഞ്ഞ മാസം സമൂഹ മാധ്യമങ്ങളിൽ നിന്നും സാമന്ത പേരില്‍ ചേര്‍ത്തിരുന്ന നാഗചൈതന്യയുടെ കുടുംബപേരായ അക്കിനേനി നീക്കിയതോടെയാണ് ഇരുവരുടെയും വേർപിരിയലിനെ കുറിച്ച് അഭ്യൂഹങ്ങൾ എത്തിയത്. 2010ലാണ് ഇരുവരും തമ്മില്‍ പ്രണയത്തിലായത്. തുടർന്ന് 2017ല്‍ ഗോവയില്‍ വച്ച്‌ ഇരുവരും വിവാഹിതരായി. സിനിമയില്‍ തുടരുന്നതിനുള‌ള സാമന്തയുടെ തീരുമാനമാണ് ഇരുതാരങ്ങളും തമ്മിലെ ബന്ധത്തില്‍ വിള‌ളലുണ്ടാകാന്‍ കാരണമായി ഗോസിപ്പുകളില്‍ വന്നിരുന്നത്. എന്തായാലും ഇരുവരുടെയും തീരുമാനം ആരാധകരെ വലിയ നിരാശയിലാണ് ആഴ്ത്തിയിരിക്കുന്നത്.
