ഏഴടി ഉയരമുള്ള അന്യഗ്രഹ ജീവികളെ കണ്ടെന്ന അവകാശവാദവുമായി പെറുവിലെ നാട്ടുകാർ. അന്യഗ്രഹ ജീവികൾ നാട്ടുകാരെ ആക്രമിക്കുന്നതായും ആളുകളുടെ മുഖം ഭക്ഷിക്കാൻ ശ്രമിക്കുന്നതായും വലിയ തലയും വെള്ളി നിറവുമാണ് ഈ അന്യഗ്രഹ ജീവികൾക്കുള്ളതെന്നും നാട്ടുകാർ മാദ്ധ്യമങ്ങളോട് വ്യക്തമാക്കി. കറുത്ത നിറത്തിലുള്ള മുഖാവരണവും ഇവർ ധരിച്ചിരുന്നുവെന്നാണ് വിവരം. ജൂലായ് 29ന് ഇവർ ഒരു 15 വയസുകാരിയെ തട്ടിക്കൊണ്ടുപോകാൻ ശ്രമിച്ചെങ്കിലും കുട്ടി രക്ഷപ്പെട്ടു. തട്ടിക്കൊണ്ടുപോകാനുള്ള ശ്രമത്തിനിടെ കുട്ടിയുടെ കഴുത്തിലും മറ്റും പരുക്കേറ്റിരുന്നു.
ജൂലായ് 11നാണ് ഇവരുടെ ശല്യം തുടങ്ങിയത്. പറന്നു നടന്നാണ് ഇവർ ആക്രമം നടത്തുന്നത്. നീണ്ട മുഖവും മഞ്ഞ നിറമുള്ള കണ്ണുകളുമുള്ള ഇവരുടെ ശല്യം കാരണം ദിവസങ്ങളായി ഉറങ്ങാൻ കഴിയുന്നില്ലെന്നാണ് നാട്ടുകാരുടെ പരാതി.എന്നാൽ ഇവർ പ്രദേശത്തെ ഒരു അനധികൃത സ്വർണ്ണ ഖനിയുമായി ബന്ധപ്പെട്ട മാഫിയയിലെ ആളുകളാണെന്നും ജെറ്റ് പാക്ക് ഉപയോഗിച്ച് പറന്ന് ആളുകൾക്കിടയിൽ പരിഭ്രാന്തിയുണ്ടാക്കുകയെന്നാണ് ഇവരുടെ ലക്ഷ്യമെന്നുമാണ് അധികൃതരുടെ വിശദീകരണം.
