ഇന്ന് വാല്മീകി ജയന്തി. ഭാരതീയ ഇതിഹാസമായ രാമായണത്തിന്റെ കർത്താവാണ് പുരാതന ഋഷിയായ വാല്മീകി (Valmiki Jayanti). ആദി കവി അല്ലെങ്കിൽ ആദ്യ കവി എന്നും അദ്ദേഹത്തെ അറിയപ്പെടാറുണ്ട്. അദ്ദേഹത്തിന്റെ ജന്മദിനമാണ് വാല്മീകി ജയന്തിയായി നാം ആചരിച്ചുവരുന്നത്. ശ്രീരാമന്റെ ഭാര്യയായ സീതയെ തന്റെ ആശ്രമത്തിലേക്ക് കൊണ്ടുപോകുകയും അവരുടെ മക്കളായ ലവനെയും കുശനെയും വളർത്തുകയും ചെയ്ത സന്യാസിയായി അദ്ദേഹം രാമായണത്തിലെ ഒരു കഥാപാത്രമായി പ്രത്യക്ഷപ്പെട്ടു. ഹിന്ദു പുരാണമനുസരിച്ച് ആശ്വിന മാസത്തിലെ പൗര്ണ്ണമി ദിനത്തിലാണ് വാൽമീകി ജനിച്ചത്. ഇതിനോടനുബന്ധിച്ച് എല്ലാ വർഷവും ആശ്വിന മാസത്തിലെ പൗര്ണ്ണമി ദിനത്തിൽ രാജ്യത്തിന്റെ വിവിധ ഭാഗങ്ങളിൽ നിരവധി മതപരവും സാമൂഹികപരവുമായ പരിപാടികൾ സംഘടിപ്പിക്കാറുണ്ട്. ഇന്നലെ വൈകിട്ട് 07:03 ന് ആരംഭിച്ച ‘പർഗത് ദിവസ്’ എന്നറിയപ്പെടുന്ന വാല്മീകി ജയന്തി ഇന്ന് വൈകിട്ട് 08:26 ന് അവസാനിക്കുകയും ചെയ്യും. വാല്മീകി ജയന്തി ദിനത്തിൽ, വാല്മീകി വിഭാഗത്തിലെ അംഗങ്ങൾ ശോഭാ യാത്രകൾ നടത്താറുണ്ട്.
വാല്മീകിയുടെ ആദ്യകാല ജീവിതം
മഹർഷി കശ്യപന്റെയും ദേവി അദിതിയുടെയും ഒൻപതാമത്തെ മകൻ വരുണനും ഭാര്യ ചാർഷിണിക്കും ജനിച്ച മഹർഷി വാല്മീകിയുടെ ജനനത്തെ ചുറ്റിപ്പറ്റി നിരവധി ഐതിഹ്യങ്ങളുണ്ട്. ഉത്തര്പ്രദേശില് കാണ്പൂര് നഗരത്തില് നിന്ന് 72 കിലോമീറ്റര് അകലെ ഗംഗാനദിയുടെ തീരത്തുള്ള ബൈത്തൂര് എന്ന കൊച്ചുനഗരം. എണ്ണായിരത്തോളം മാത്രം ജനസംഖ്യയും ആയിരക്കണക്കിനു വര്ഷങ്ങളുടെ പഴക്കവുമുള്ള ഈ ചെറുപട്ടണത്തിലായിരുന്നു ആദി കവിയായ വാല്മീകി ജീവിച്ചിരുന്നത്.
‘വാൽമീകി’ എന്ന പേര് ലഭിച്ചതിനു പിന്നിലെ ഐതിഹ്യം
കാട്ടാളനില് നിന്ന് ഈശ്വരാംശം നിറഞ്ഞ മുനിയിലേക്കുള്ള യാത്രയാണ് വാല്മീകിയുടെ ജീവിതം. രത്നാകരന് എന്നായിരുന്നു പൂര്വ്വാശ്രമത്തിലെ നാമം. ഭാര്യയും മക്കളുമായി കാട്ടിലായിരുന്നു വാസം. വഴിപോക്കരെ കൊള്ളയടിച്ചായിരുന്നു ഉപജീവനം. ഒരിക്കല് സപ്തര്ഷികള് ആ വഴി വന്നു. രത്നാകരന് അവരേയും കൊള്ളയടിക്കാന് ശ്രമിച്ചു. ഈ പാപവൃത്തിയുടെ ഫലം ആരെല്ലാം അനുഭവിക്കേണ്ടിവരുമെന്ന ചോദ്യത്തിന് മുന്നില് രത്നാകരന് ഉത്തരം മുട്ടി. ഭാര്യയും മക്കളും ഈ പാപഭാരം ചുമക്കുമോയെന്നറിയാന് രത്നാകരന് അവരെ സമീപിച്ചു. താന്താന് ചെയ്യുന്ന പാപകര്മ്മങ്ങളുടെ ഫലം അവനവന് തന്നെ അനുഭവിക്കണമെന്നായിരുന്നു അവരുടെ മറുപടി.
ആ മറുപടി രത്നാകരന്റെ കണ്ണുതുറപ്പിച്ചു. അവന് സപ്തര്ഷികളെ സമീപിച്ചു. ചെയ്തുപോയ അപരാധങ്ങള്ക്കെല്ലാം മാപ്പുചോദിച്ചു. ശിഷ്ടകാലം ഈശ്വരനെ ഭജിച്ച് ജീവിക്കണമെന്ന ആഗ്രഹം പ്രകടിപ്പിച്ചു. ഒരിക്കല്പോലും ഈശ്വര ചിന്തയില്ലാതിരുന്ന രത്നാകരന്റെ നാവിന് ഭഗവദ് നാമം അത്രവേഗം വഴങ്ങുന്നതായിരുന്നില്ല. അത് മനസ്സിലാക്കിയ സപ്തര്ഷികള് ഒരുപായം കണ്ടെക്കി. രാമ രാമ എന്നതിന് പകരം മരാ മരാ എന്ന് ജപിക്കാന് നിര്ദ്ദേശിച്ചു. അതും വേഗത്തില് വേണം. ക്രമേണ മരാ മരാ എന്നത് ശ്രീരാമദേവന്റെ അനുഗ്രഹത്താല് രാമ രാമ എന്നായി മാറി. നാളുകള് പലത് കടന്നുപോയി. തീവ്ര തപസ്സനുഷ്ഠിച്ച രത്നാകരന്റെ ശരീരം ചിതല്പുറ്റുകൊണ്ട് മൂടി. പുറ്റില് നിന്നും രാമ ശബ്ദം കേട്ട ഋഷിമാര് രത്നാകരനെ ചിതല്പുറ്റില് നിന്നും പുറത്തുകൊണ്ടുവന്നു. ചിതല്പുറ്റില് നിന്നും പുറത്തുവന്നതിനാല് വാല്മീകി എന്ന പേരു ലഭിച്ചു. ഈ ഋഷിമാരുടെ പ്രേരണയാലാണ് രാമായണം രചിച്ചതെന്നുമാണ് ഐതിഹ്യം.
വാല്മീകി എന്നാൽ ‘ചിതൽ പുറ്റിൽ നിന്ന് ജനിച്ച ആൾ’ എന്നാണ് അർത്ഥം. വാല്മീകി നാരദ മുനിയിൽ നിന്നാണ് ശ്രീരാമന്റെ കഥ പഠിച്ചത്. അദ്ദേഹത്തിന്റെ മേൽനോട്ടത്തിൽ അദ്ദേഹം രാമന്റെ കഥ കാവ്യാത്മക വരികളിൽ എഴുതി. ഇത് പിന്നീട് രാമായണ ഇതിഹാസത്തിന് കാരണമായി. രാമായണത്തിൽ 24,000 ശ്ലോകങ്ങളും ഉത്തരകാണ്ഡം ഉൾപ്പെടെ ഏഴ് കാണ്ഡങ്ങളും അടങ്ങിയിരിക്കുന്നു. രാമായണത്തിന് ഏകദേശം 480,002 വാക്കുകൾ ദൈർഘ്യമുണ്ട്. ഇതിന് മറ്റൊരു ഹിന്ദു ഇതിഹാസമായ മഹാഭാരതത്തിന്റെ സമ്പൂർണ്ണ പാഠത്തിന്റെ നാലിലൊന്ന് അല്ലെങ്കിൽ പഴയ ഗ്രീക്ക് ഇതിഹാസമായ ഇലിയഡിന്റെ നാലിരട്ടി ദൈർഘ്യമുണ്ട്.
