മദ്യ കമ്പനിയുടെ പരസ്യത്തിൽ നിന്നും പിന്മാറി അല്ലു അർജുൻ. പത്ത് കോടി രൂപ വാഗ്ദാനം ചെയ്ത പരസ്യമാണ് താരം നിരസിച്ചത്. പരസ്യത്തിൽ അഭിനയിച്ചാൽ അത് ആരാധകരിൽ തെറ്റായ സ്വാധീനം ഉണ്ടാക്കും എന്നതിനാലാണ് അല്ലു അഭിനയിക്കാതിരുന്നതെന്നാണ് പുറത്ത് വരുന്ന വിവരം. അതേസമയം ഇത് ആദ്യമായി അല്ല താരം പരസ്യത്തിൽ നിന്നും പിന്മാറുന്നത്. മുമ്പ് ഒരു പാൻ മസാല ബ്രാൻഡിന്റെ പരസ്യത്തിൽ നിന്നും അല്ലു അർജുൻ പിന്മാറിയിരുന്നു. ആരാധകർക്ക് തെറ്റായ മാതൃക സൃഷ്ടിക്കും എന്നതിനാലായിരുന്നു അന്നത്തെ പിന്മാറ്റം.
ഈ പരസ്യങ്ങളിൽ നിന്നും പിന്മാറി എങ്കിലും മുമ്പ് മറ്റൊരു പരസ്യത്തിൽ അഭിനയിച്ചതിന്റെ പേരിൽ താരത്തിനെതിരെ പരാതി ഉയർന്നിരുന്നു. വിദ്യാഭ്യാസ സ്ഥാപനത്തെ കുറിച്ചുള്ള പരസ്യത്തിൽ അഭിനയിച്ചതിനെ തുടർന്നായിരുന്നു ഇത്. പരസ്യം സമൂഹത്തിൽ തെറ്റിദ്ധാരണ ഉളവാക്കുന്നതാണെന്ന് ചൂണ്ടിക്കാട്ടി ഒരു സാമൂഹിക പ്രവർത്തകനാണ് പരാതി നൽകിയത്.
