കരിംനഗർ: വെള്ളമെടുക്കാൻ പോയ സമയത്ത് വീട്ടിലെ കിണറ്റിൽ കാലുതെറ്റി വീണ 80 കാരിക്ക്
രക്ഷകരായി അഗ്നിശമന സേനാംഗംങ്ങൾ. തെലങ്കാനയിലെ കരിംനഗറിലാണ് സംഭവം. 20 അടിയോളം താഴ്ചയുണ്ടായിരുന്ന കിണറ്റിലാണ് വീണത്.ചെറിയ പരിക്കുകളോടെ വയോധികയെ അത്ഭുതകരമായി അഗ്നിശമന സേന രക്ഷപെടുത്തി. ഇവർ കിണറ്റിലേക്ക് വീണപ്പോൾ തന്നെ കുടുംബാംഗങ്ങൾ പോലീസിൽ വിവരമറിയിക്കുകയും അവർ അഗ്നിശമന സംഘത്തെ വിളിക്കുകയുമായിരുന്നു.
രാവിലെ ആറ് മണിയോടെയായിരുന്നു അപകടം. ഉദ്യോഗസ്ഥർ സ്ഥലത്തെത്തി പരിശോധിച്ചപ്പോൾ കിണറ്റിൽ വലിയ തോതിൽ വെള്ളമില്ലെന്ന് മനസ്സിലായി. അഗ്നി ശമന സേനാംഗങ്ങളിലൊരാൾ കിണറ്റിലിറങ്ങിയാണ് വയോധികയെ രക്ഷപ്പെടുത്തിയത്. നിസ്സാര പരിക്കുകൾ മാത്രമേ ഉള്ളൂ എന്ന്
ഉദ്യോഗസ്ഥർ അറിയിച്ചു.