കുമളി : ഇടുക്കി ചിന്നക്കനാലിൽ നിന്ന് പെരിയാര്‍ ടൈഗർ റിസർവിലേക്കു കാട് കടത്തിയ കാട്ടാന അരിക്കൊമ്പന്, തുറന്നുവിട്ട സ്ഥലത്തിനു മൂന്നു കിലോമീറ്റര്‍ പരിധിയില്‍ തുടരുന്നുവെന്ന് റിപ്പോർട്ട്. അരിക്കൊമ്പന് ഭക്ഷിക്കാനായി വിവിധ സ്ഥലങ്ങളിലായി പുല്ല് വച്ചിരുന്നെങ്കിലും ആന അത് എടുത്തില്ല. മരുന്നുചേര്‍ത്ത വെള്ളം വച്ച വീപ്പകളില്‍ രണ്ടെണ്ണവും മറിച്ചിട്ടു. ആറ് ആനകളടങ്ങിയ ഒരു ആനക്കൂട്ടം സമീപത്തെത്തിയെങ്കിലും അരിക്കൊമ്പന് പിന്മാറി. വെറ്ററിനറി ഡോക്ടര്‍ ഉള്‍പ്പെടെ എട്ടംഗ സംഘം ആനയെ നിരീക്ഷണത്തിലാണ് നിലവിൽ അരിക്കൊമ്പനുള്ളത്.
ഇന്നലെ പുലർച്ചെയോടെയാണ് അരിക്കൊമ്പനെ പെരിയാർ ടൈഗർ റിസർവിലെ ഉൾവനത്തിലേക്കു മാറ്റിയത്. ചിന്നക്കനാലിൽനിന്നു ലോറിയിൽ കയറ്റി പെരിയാർ ടൈഗർ റിസർവിലേക്കു വരുന്നതിനിടെ അരിക്കൊമ്പന്റെ തുമ്പിക്കൈയ്ക്കു സാമാന്യം ആഴത്തിൽ മുറിവേറ്റിരുന്നു. ഇത് ഉണങ്ങാൻ വേണ്ട മരുന്നു നൽകിയ ശേഷമാണ് ആനയെ ഉൾവനത്തിലേക്ക് തുറന്ന് വിട്ടത്. ചിന്നക്കനാലിൽനിന്നു ലോറിയിൽ കയറ്റിയ സമയത്തോ യാത്രയ്ക്കിടയിലോ ആയിരിക്കാം പരിക്കേറ്റതെന്നാണു കരുതുന്നത്. എന്നാൽ ദൗത്യത്തിനു ഒരു ദിവസത്തിന് മുൻപ് ചക്കക്കൊമ്പനുമായി ഏറ്റുമുട്ടിയപ്പോഴും അരിക്കൊമ്പന്റെ ശരീരത്തിൽ മുറിവുകൾ പറ്റിയിരുന്നെന്നു ദൗത്യസംഘം അറിയിച്ചു.
