വ്യത്യസ്തമായ ചിത്രങ്ങൾ കൊണ്ട് പ്രേക്ഷകരുടെയും, സിനിമ പ്രേമികളുടെയും ഹൃദയത്തിൽ ചേക്കേറിയ സംവിധായകനാണ് ബേസിൽ ജോസഫ്. ഈ സംവിധായകന്റെ ചിത്രങ്ങൾക്കായുള്ള കാത്തിരിപ്പിലാണ് ആരാധകർ. അതുപോലെ മികച്ച നായികയായി തിളങ്ങുകയാണ് ദർശന രാജേന്ദ്രനും. അവസാനമായി ഇറങ്ങിയ ഹൃദയത്തിലും മികച്ച അഭിനയമാണ് നടി കാഴ്ചവെച്ചത്.
ഇപ്പോഴിതാ ബേസിൽ ജോസഫും ദർശന രാജേന്ദ്രനും ഒന്നിക്കുന്ന പുതിയ ചിത്രം പ്രഖ്യാപിച്ചിരിക്കുകയാണ്. ജയ ജയ ജയ ജയ ഹേ എന്നു പേരിട്ടിരിക്കുന്ന ചിത്രം വിപിൻ ദാസാണ് സംവിധാനം ചെയ്യുന്നത്. മോഷൻ പോസ്റ്ററിലൂടെയാണ് ചിത്രം പ്രഖ്യാപിച്ചത്. ഇത്തവണ നായകനാകാനാണ് ബേസിൽ എത്തുന്നത്. ദർശനയെയാണ് പോസ്റ്ററിൽ കാണുന്നത്.
ബേസിലിനെ പ്രധാന കഥാപാത്രമാക്കി ഒരുക്കിയ ജാനേമനിന്റെ നിർമാതാക്കളായ ചിയേഴ്സ് എന്റര്ടെയ്ൻമെന്റ്സ് തന്നെയാണ് പുതിയ സിനിമയും നിർമിക്കുന്നത്. മാത്രമല്ല ചിത്രത്തിന്റെ അണിയറ പ്രവർത്തകരെക്കുറിച്ചും അഭിനേതാക്കളെക്കുറിച്ചുമുള്ള കൂടുതൽ വിവരങ്ങൾ പങ്കുവച്ചിട്ടില്ല. അതേസമയം കഴിഞ്ഞ വർഷം ബേസിലിന്റേതായി പുറത്തുവന്ന രണ്ട് ചിത്രങ്ങളും സൂപ്പർഹിറ്റായിരുന്നു. ബേസിൽ സംവിധാനം ചെയ്ത മിന്നൽ മുരളി ലോക ശ്രദ്ധ നേടിയപ്പോൾ ജാനേ മൻ വൻ വിജയമായി മാറി.