മുംബൈ : കടുത്ത നടുവേദനയെ തുടർന്ന്ഓസ്‌ട്രേലിയയ്‌ക്കെതിരായ ഏകദിന പരമ്പരയ്ക്കുള്ള ഇന്ത്യൻ ടീമിൽ നിന്നു പുറത്തായ ശ്രേയസ് അയ്യർക്ക് പകരക്കാരനെ ടീമിലുൾപ്പെടുത്താതെ ബിസിസിഐ. തിങ്കളാഴ്ച ഓസ്ട്രേലിയയ്ക്കെതിരായ ടെസ്റ്റ് പരമ്പര കഴിഞ്ഞതിനു പിന്നാലെ ബിസിസിഐ സെലക്ഷൻ കമ്മിറ്റി അയ്യരുടെ പകരക്കാരനെ പ്രഖ്യാപിക്കുമെന്നായിരുന്നു റിപ്പോർട്ടുകൾ.
നാലാം ടെസ്റ്റിനിടയിലായാണ് ശ്രേയസ് അയ്യർക്ക് കടുത്ത നടുവേദന അനുഭവപ്പെട്ടത്. തുടർന്ന് താരത്തിന് ബാറ്റിങിനിറങ്ങാൻ സാധിച്ചിരുന്നില്ല. തുടർന്ന് താരത്തെ പരിശോധനകൾക്കു വിധേയനാക്കി. വിശ്രമം ആവശ്യമായതിനാൽ താരത്തിന് ഏതാനും ഐപിഎൽ മത്സരങ്ങളും നഷ്ടമാകുമെന്നാണ് ഇപ്പോൾ പുറത്തുവരുന്ന വിവരം. ഇന്ത്യൻ പ്രീമിയർ ലീഗിൽ കൊൽക്കത്ത നൈറ്റ് റൈഡേഴ്സിന്റെ നായകനാണ് ശ്രേയസ് അയ്യർ.
നിലവിൽ പ്രഖ്യാപിച്ചിട്ടുള്ള 18 അംഗ ടീമിൽനിന്നു തന്നെ മറ്റൊരു താരത്തെ കളിപ്പിക്കാനാണു ബിസിസിഐയുടെ നീക്കം. ഇതോടെ ഇന്ത്യൻ ടീമിലേക്കു മടങ്ങിയെത്താൻ സഞ്ജു സാംസണ് ഇനിയും കാത്തിരിക്കേണ്ടിവരും. അയ്യർക്കു പകരം സഞ്ജു സാംസണെ ടീമിൽ എടുത്തേക്കുമെന്നു നേരത്തേ റിപ്പോർട്ടുകളുണ്ടായിരുന്നു.
