കൊൽക്കത്ത: ബംഗാളിലെ ഡോക്ടർമാരുടെ സമരം കൂടുതൽ വഷളാകുന്നു. സമരത്തില്‍ അന്ത്യശാസനവുമായി ഡല്‍ഹി എയിംസിലെ ഡോക്ടര്‍മാര്‍ രംഗത്തെത്തി. 48 മണിക്കൂറിനകം പ്രശ്‌നം പരിഹരിച്ചില്ലെങ്കില്‍ അനിശ്ചിതകാല സമരം തുടങ്ങുമെന്നാണ് എയിംസിലെ ഡോക്ടര്‍മാര്‍ അറിയിച്ചത്.
സമരത്തിന് ഐക്യദാര്‍ഢ്യം പ്രകടിപ്പിച്ച് ബംഗാളില്‍ ഇതുവരെ 700ലധികം ഡോക്ടര്‍മാര്‍ രാജിവെച്ചുകഴിഞ്ഞു . ഇന്നലെ മാത്രം 300ഓളം ഡോക്ടര്‍മാരാണ് സര്‍ക്കാര്‍ ആശുപത്രികളില്‍ നിന്ന് രാജിവെച്ചത്. മുഖ്യമന്ത്രി മമതാ ബാനർജി ഡോക്ടർമാരുമായി ചര്‍ച്ചയ്ക്ക് ശ്രമിച്ചെങ്കിലും ഡോക്ടർമാർ സഹകരിച്ചില്ല. മമതാ ബാനർജി ഡോക്ടർമാർക്കെതിരേ നടത്തിയ പ്രസ്താവന പിൻവലിച്ച് മാപ്പ് പറയണമെന്നാണ് അവരുടെ ആവശ്യം.
ഇതിനിടെയാണ് അന്ത്യശാസനവുമായി എയിംസിലെ ഡോക്ടര്‍മാര്‍ രംഗത്തെതിയത്. ഡോക്ടര്‍മാരുടെ സമരത്തിന് പിന്തുണ പ്രഖ്യാപിച്ച് എയിംസ് റെസിഡന്‍റ് ഡോക്‌ടേഴ്‌സ് അസോസിയേഷന്‍ ഇന്നലെ ജോലി ബഹിഷ്‌കരിച്ചിരുന്നു. ഇന്ന് ചേർന്ന എയിംസ് റെസിഡന്‍റ് ഡോക്‌ടേഴ്‌സ് അസോസിയേഷന്‍റെ ജനറല്‍ ബോഡി യോഗത്തിലാണ് സമരം വ്യാപിപ്പിക്കാന്‍ തീരുമാനിച്ചത്.
ബംഗാള്‍ സര്‍ക്കാര്‍ ഡോക്ര്‍മാരോട് ശത്രുതാപരമായ നിലപാടാണ് സ്വീകരിക്കുന്നതെന്ന് എയിംസിലെ ഡോക്ടര്‍മാര്‍ ആരോപിച്ചു. ബംഗാള്‍ സര്‍ക്കാരിന്‍റെ നിലപാടിനെ അപലപിച്ച ഡോക്ടര്‍മാര്‍ കേന്ദ്രസര്‍ക്കാര്‍ നിലപാടിനെയും കേന്ദ്ര ആരോഗ്യ മന്ത്രിയേയും പ്രശംസിക്കുകയും ചെയ്തു. സഫ്ദര്‍ഗഞ്ച് ആശുപത്രിയിലെ റെസിഡന്‍റ് ഡോക്‌ടേഴ്‌സ് അസോസിയേഷനും സമാന നിലപാടിലേക്കാണ് നീങ്ങുന്നത്. 48 മണിക്കൂറിനുള്ളില്‍ പ്രള്‌നം പരിഹരിച്ചില്ലെങ്കില്‍ അനിശ്ചിതകാല സമരം തുടങ്ങുമെന്നും സഫ്ദര്‍ഗഞ്ച് റെസിഡന്‍റ് ഡോക്‌ടേഴ്‌സ് അസോസിയേഷന്‍ വ്യക്തമാക്കി.
ബംഗാളിലെ ഡോക്ടര്‍മാരുടെ സമരത്തിന് ഐക്യദാര്‍ഢ്യം പ്രഖ്യാപിച്ച് തിങ്കളാഴ്ച ഐഎംഎ ദേശീയ പണിമുടക്കിന് ആഹ്വാനം നല്‍കിയിട്ടുണ്ട്. അതിനിടെ സമരത്തില്‍ ഇടക്കാല ഉത്തരവ് പുറപ്പെടുവിക്കണമെന്ന ആവശ്യം കൊല്‍ക്കത്ത ഹൈക്കോടതി അംഗീകരിച്ചില്ല. സമരം ചെയ്യുന്ന ഡോക്ടര്‍മാരെ അനുനയിപ്പിക്കാന്‍ സംസ്ഥാന സര്‍ക്കാരിനോട് കോടതി ആവശ്യപ്പെട്ടു.
