ജറുസലം: ഗാസ മുനമ്പില്‍ സൈനിക നടപടി ആവശ്യമായി വന്നാല്‍ അതിനു മടക്കില്ലെന്ന് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു. ഇസ്രയേല്‍ യുദ്ധക്കൊതിയന്മാരല്ല. എന്നാല്‍, ആവശ്യമായി വന്നാല്‍ ഏത് നീക്കത്തിനും സജ്ജവുമാണ്- നെതന്യാഹു വ്യക്തമാക്കി. ടൈംസ് ഓഫ് ഇസ്രയേല്‍ ആണ് ഇത് സംബന്ധിച്ച വാര്‍ത്ത റിപ്പോര്‍ട്ട് ചെയ്തത്.
സെപ്റ്റംബറില്‍ നടക്കാനിരിക്കുന്ന തിരഞ്ഞെടുപ്പ് മുന്നില്‍ കണ്ടാണ് ഗാസയില്‍ സൈനിക നടപടികള്‍ക്ക് മുതിരാത്തത് എന്ന വിമര്‍ശനങ്ങളെയും നെതന്യാഹു തള്ളി. ഇത്തരം വാര്‍ത്തകള്‍ അടിസ്ഥാനമില്ലെന്ന് അദ്ദേഹം പറഞ്ഞു. എന്നെ അറിയാവുന്നവര്‍ക്ക് എന്‍റെ നടപടികള്‍ സംബന്ധിച്ചും വ്യക്തമായി അറിയാം. രാജ്യത്തെ രാഷ്ട്രീയ കാലാവസ്ഥ നോക്കിയല്ല താന്‍ ഇതുവരെ തീരുമാനങ്ങള്‍ എടുത്തിട്ടുള്ളതും ഇനി എടുക്കാന്‍ പോകുന്നതും- നെതന്യാഹു വ്യക്തമാക്കി.
കഴിഞ്ഞ ദിവസം ഗാസ മുനമ്പില്‍ നിന്നുണ്ടായ മിസൈല്‍ ആക്രമണത്തിന്‍റെ പശ്ചാത്തലത്തിലായിരുന്നു നെതന്യാഹുവിന്‍റെ വാക്കുകള്‍. ശനിയാഴ്ച ഉണ്ടായ മിസൈല്‍ ആക്രമണത്തില്‍ കെട്ടിടങ്ങള്‍ തകര്‍ന്നെങ്കിലും ആളുകള്‍ക്ക് പരിക്കേറ്റിരുന്നില്ല.
