മലയാളത്തിൽ നിന്നും താൽകാലികമായി മാറി നിൽക്കുന്നുണ്ടെങ്കിലും കന്നഡയിൽ തിരക്കുള്ള നായികയാണ് ഭാവന. ഇപ്പോഴിതാ ഭാവന നായികയായി എത്തുന്ന ചിത്രം ‘ഭജറംഗി 2’ന്റെ റിലീസ് ഡേറ്റ് പ്രഖ്യാപിച്ചിരിക്കുകയാണ്. ചിത്രത്തിൽ ശിവരാജ് കുമാറാണ് നായകനായി എത്തുന്നത്. ഒക്ടോബര് 29ന് തീയറ്ററിലൂടെയാണ് ചിത്രം റിലീസിന് എത്തുന്നത്. രാജ്യത്തും വിദേശത്തുമുള്ള തിയറ്ററുകളിൽ ചിത്രം റിലീസ് ചെയ്യും.
2013-ൽ പുറത്തിറങ്ങിയ ഫാന്റസി ആക്ഷന് ചിത്രത്തിന്റെ രണ്ടാംഭാഗമാണ് ഇത്. മാത്രമല്ല ഈ ചിത്രത്തിൽ വ്യത്യസ്ത ഗെറ്റപ്പിലാണ് താരം എത്തുന്നത്. ഭാവനയുടെ ലുക്ക് വൈറലായിരുന്നു. ചിത്രത്തിന്റെ രചനയും സംവിധാനവും നിർവഹിക്കുന്നത് എ ഹര്ഷയാണ്. ജയണ്ണ ഫിലിംസിന്റെ ബാനറില് ജയണ്ണ, ഭോഗേന്ദ്ര എന്നിവര് ചേര്ന്നാണ് ചിത്രത്തിന്റെ നിര്മ്മാണം. സ്വാമി ജെ ഗൗഡയാണ് ഛായാഗ്രഹണം. സംഗീതം അര്ജുന് ജന്യ. എഡിറ്റിംഗ് ദീപു എസ് കുമാര്. കലാസംവിധാനം രവി ശന്തേഹൈക്ലു, സംഭാഷണം രഘു നിഡുവള്ളി, ഡോ രവി വര്മ്മ, വിക്രം എന്നിവരാണ് ആക്ഷന് കൊറിയോഗ്രഫി. ഭജറംഗി 2 കൂടാതെ തിലകിന്റെ സംവിധാനത്തില് ഒരുങ്ങിയ ഗോവിന്ദ ഗോവിന്ദ, നാഗശേഖര് സംവിധാനം ചെയ്യുന്ന ശ്രീകൃഷ്ണ അറ്റ് ജിമെയില് ഡോട്ട് കോം എന്നിവയാണ് ഭാവനയുടേതായി പുറത്തിറങ്ങാനിരിക്കുന്ന കന്നഡ ചിത്രങ്ങള്.