കളിക്കളത്തിലെ മാന്ത്രിക കഴിവുകൾ കൊണ്ട് ഫുട്ബോൾ ലോകം കീഴടക്കിയ പ്രതിഭയാണ് അർജന്റീനിയൻ ഫുട്ബോൾ താരം ലയണൽ മെസ്സി. ലോകഫുട്ബോളിലെ ഏറ്റവും മികച്ച ഡിഫൻഡർമാരിൽ ഭൂരിഭാഗവും ഇപ്പോഴും മെസ്സിക്കൊപ്പം പിടിച്ചുനിൽക്കാൻ പാടുപെടുന്നു എന്നത് ലോകഫുട്ബോളിൽ മെസ്സിയുടെ കഴിവ് എത്ര വലുതാണെന്ന് കാണിക്കുന്നു. പ്രശസ്ത അര്ജന്റൈന് ടെലിവിഷന് സീരീസില് അഭിനയ രംഗത്തേക്കുള്ള കാല്വെപ്പ് നടത്തി ഇതിഹാസ താരം ലയണല് മെസി. അര്ജന്റീനയിലെ ജനപ്രിയ ടി.വി ഷോ ആയ ‘ലോസ് പ്രൊടക്ടേഴ്സില്’ അതിഥി വേഷം ചെയ്ത് കൊണ്ടാണ് താരം അഭിനയ രംഗത്ത് അരങ്ങേറ്റം കുറിച്ചിരിക്കുന്നത്.
സ്റ്റാര് പ്ലസില് സംപ്രേക്ഷണം ചെയ്യുന്ന ഹിറ്റ് സീരീസില് മൂന്ന് ഏജന്റുമാരുടെ കഥയാണ് പ്രമേയം. പ്രശസ്ത അര്ജന്റൈന് അഭിനേതാക്കളായ ആന്ദ്രേസ് പരാ, അഡ്രിയാന് സുവാര്, ഗുസ്താവോ ബെര്മൂഡസ് എന്നിവരാണ് ഏജന്റുമാരുടെ വേഷങ്ങള് ചെയ്തിരിക്കുന്നത്. ഏകദേശം അഞ്ച് മിനിട്ടാണ് സീരീസില് മെസി അഭിനയിച്ചിരിക്കുന്നത്.
മെസിയായി തന്നെയാണ് താരം സീരീസില് അഭിനയിച്ചിരിക്കുന്നത്. ബിസിനസ് ആവശ്യത്തിനായി മൂന്ന് ഏജന്റുമാര് മെസിയെ സമീപിക്കുന്നതും അവരോടുള്ള മെസിയുടെ സംഭാഷണവുമാണ് ദൃശ്യങ്ങളില്. ബ്യൂണസ് ഐറിസിലും പാരീസിലുമായാണ് സീരീസ് ചിത്രീകരിച്ചിരിക്കുന്നത്.