കോട്ടയം: കോട്ടയം എം.ജി സർവകലാശാല സെനറ്റ് തിരഞ്ഞെടുപ്പിനിടെയുണ്ടായ സംഘര്ഷത്തില് വനിതാ നേതാവിനെ ആക്രമിച്ച സംഭവത്തില് ഏഴ് എസ്.എഫ്.ഐ പ്രവർത്തകർക്കെതിരെ കേസ്. അക്രമത്തിനിരയായ വനിത നേതാവ് കോട്ടയം ഗാന്ധിനഗര് പോലീസ് സ്റ്റേഷനില് എത്തി പൊലീസിന് മൊഴി നല്കിയതിന് പിന്നാലെയാണ് കേസ് രജിസ്റ്റര് ചെയ്തത്. ഇതേതുടർന്ന് എസ്.എഫ്.ഐ എറണാകുളം ജില്ലാ ഭാരവാഹികളായ അമല് സി എ, അര്ഷോ, പ്രജിത്ത്, വിദ്യാഭ്യാസ മന്ത്രിയുടെ പേഴ്സണല് സ്റ്റാഫ് ആയ കെ.എം അരുണ്, കോട്ടയം നേതാക്കളായ ഷിയാസ്, ടോണി കുരിയാക്കോസ്, സുധിന് എന്നിവര്ക്ക് എതിരെയാണ് ഗാന്ധിനഗര് പൊലീസ് കേസെടുത്തത്.
സ്ത്രീയെ ഉപദ്രവിച്ചതിനും ജാതീയ അധിക്ഷേപത്തിനുമാണ് കേസെടുത്തിരിക്കുന്നത്. എസ്എഫ്ഐ നേതാക്കള്ക്കെതിരെ എ.ഐ.എസ്എ.ഫ് വനിതാ നേതാവ് പൊലീസിന് മൊഴി നല്കിയതിന് പിന്നാലെയാണ് പൊലീസ് കേസ് രജിസ്റ്റര് ചെയ്തത്. എം.ജി സര്വകാലശാല സെനറ്റ് തെരെഞ്ഞെടുപ്പിനിടെ ശാരീരികമായി മര്ദിക്കുകയും ജാതിപറഞ്ഞ് അധിക്ഷേപിക്കുകയും ബലാത്സംഗ ഭീഷണി മുഴക്കുകയും ചെയ്തുവെന്നാണ് കോട്ടയം ജില്ലാ പൊലീസ് സുപ്രണ്ടിന് നല്കിയ പരാതി.