രക്ഷപെടാൻ സാധ്യത? നടൻ ദിലീപിനെതിരായ കുറ്റാരോപണങ്ങൾ ലഘൂകരിക്കും

കൊച്ചി ∙ മലയാള സിനിമ ആസ്വാദകരുടെ ജനപ്രിയ നായകനാണ് ദിലീപ് എങ്കിലും നടിയെ തട്ടിക്കൊണ്ടുപോയി പീഡിപ്പിച്ച കേസിൽ പ്രതിചേർക്കപ്പെട്ടതോടെ നിരവധി എതിരാളികൾ ദിലീപിനുണ്ടായി. എന്നാൽ മലയാള സിനിമയിൽ വലിയ തിരിച്ചുവരവ് അദ്ദേഹം നടത്തിയിരുന്നു. അദ്ദേഹത്തെ പിന്തുണച്ചു സിനിമയിലുള്ളവരടക്കം രംഗത്തെത്തിയിരുന്നു. ഇപ്പോഴിതാ ദിലീപിന്റെ ക്വട്ടേഷൻ പ്രകാരം അപകീർത്തികരമായ ദൃശ്യങ്ങൾ പകർത്താൻ നടിയെ തട്ടിക്കൊണ്ടുപോയി പീഡിപ്പിച്ച കേസിൽ നടൻ ദിലീപിനെതിരായ കുറ്റാരോപണങ്ങളിൽ ഭാഗിക മാറ്റങ്ങൾ വരുത്താൻ കോടതി അനുവാദം നൽകി. മാത്രമല്ല ഹൈക്കോടതിയുടെ പരിഗണനയ്ക്കു വന്ന കുറ്റപത്രത്തിൽ കാതലായ മാറ്റങ്ങൾ വരുത്തുന്നതിനെ പ്രതിഭാഗം എതിർത്തിരുന്നു.

ഇതോടെ ദിലീപിന്റെ ജാമ്യം റദ്ദാക്കാനുള്ള പ്രോസിക്യൂഷന്റെ അപേക്ഷ വിചാരണക്കോടതി 19 ലേക്കു മാറ്റി. ഇതിനോട് ബന്ധപ്പെട്ട മറ്റു ഹർജികളും അന്നു പരിഗണിക്കും എന്നാണ് റിപ്പോർട്ട് . ഈ മാസം 21 നു കേസിന്റെ രഹസ്യ വിചാരണ വീണ്ടും തുടങ്ങും. നടിയെ ആക്രമിച്ച കേസിലെ മാപ്പുസാക്ഷി വിപിൻലാലിനെ അന്നു വിസ്തരിക്കും. വിചാരണക്കോടതിയോടുള്ള അതൃപ്തി പ്രകടിപ്പിച്ചു സ്പെഷൽ പ്രോസിക്യൂട്ടർ രാജിവച്ചതിനെ തുടർന്നു വിചാരണ മുടങ്ങിയിരുന്നു. എന്നാൽ പുതിയ സ്പെഷൽ പ്രോസിക്യൂട്ടറെ നിയമിച്ചതോടെയാണു വിചാരണ പുനരാരംഭിക്കുന്നത്.