പുണെ : ചെന്നൈ സൂപ്പർ കിങ്സ് യുവതാരം ഋതുരാജ് ഗെയ്ക്വാദ് വിവാഹിതനായി. വനിതാ ക്രിക്കറ്റ് താരമായ ഉത്കർഷ പവാറാണ് ഋതുരാജിന്റെ വധു. ദീർഘകാലമായി ഇരുവരും പ്രണയത്തിലായിരുന്നു. മഹാരാഷ്ട്ര വനിതാ ക്രിക്കറ്റ് ടീമിൽ അംഗമാണ് ഉത്കർഷ. മഹാരാഷ്ട്രയിലെ മഹാബലേശ്വറിൽ വച്ചായിരുന്നു താരത്തിന്റെ വിവാഹം.
ചെന്നൈ സൂപ്പർ കിങ്സ് താരങ്ങളായ ശിവം ദുബെ, പ്രശാന്ത് സോളങ്കി തുടങ്ങിയവർ ഋതുരാജിന്റെ വിവാഹത്തിൽ പങ്കെടുക്കാനെത്തി. കൂടാതെ രാജസ്ഥാൻ റോയൽസ് താരം ദേവ്ദത്ത് പടിക്കൽ, രജത് പാട്ടിദാർ തുടങ്ങിയവർ നവദമ്പതികൾക്ക് ആശംസകൾ നേർന്നു.
പുണെ സ്വദേശിയായ ഇരുപത്തിനാലുകാരി ഉത്കർഷ, 2012-13, 2017-18 സീസണുകളിൽ മഹാരാഷ്ട്ര അണ്ടർ-19 ടീമിൽ അംഗമായിരുന്നു. ഒന്നരവർഷം മുൻപാണ് ഉത്കർഷ അവസാനമായി കളത്തിലിറങ്ങിയത്. ഇപ്പോൾ പുണെയിലെ ഇൻസ്റ്റിറ്റ്യൂട്ട് ഓഫ് ന്യൂട്രീഷൻ ആൻഡ് ഫിറ്റ്നസ് സയൻസസിൽ പഠിക്കുകയാണ്.
പുണെ സ്വദേശിയായ ഋതുരാജ് ഗെയ്ക്വാദ് മഹാരാഷ്ട്ര പുരുഷ ക്രിക്കറ്റ് ടീമിന്റെ ക്യാപ്റ്റനാണ്. കഴിഞ്ഞ വർഷം. ഗെയ്‌ക്‌വാദും ഉത്‌കർഷയും ജിമ്മിൽ ഒരുമിച്ച് വർക്ക്ഔട്ട് ചെയ്യുന്നതിനിടയിലുള്ള ചിത്രം പുറത്തുവന്നിരുന്നു. ഇതോടെയാണ് ഇരുവരും പ്രണയത്തിലാണെന്ന തരത്തിലുള്ള വാർത്തകൾ പ്രചരിക്കുവാൻ ആരംഭിച്ചത്.
