ദില്ലി : സംയുക്ത സേനാ മേധാവി (Chief of Defence Staff – CDS) ജനറൽ അനിൽ ചൗഹാൻ്റെ കാലാവധി 2026 മെയ് 30 വരെ നീട്ടി കേന്ദ്ര സർക്കാർ ഉത്തരവിറക്കി. 2022 സെപ്റ്റംബർ 28-നാണ് അദ്ദേഹം സിഡിഎസ് ആയി ചുമതലയേറ്റത്.
പ്രതിരോധ മന്ത്രാലയം പുറത്തിറക്കിയ പ്രസ്താവനയിലാണ് ഈ വിവരം അറിയിച്ചത്. അദ്ദേഹത്തിൻ്റെ കാലാവധി 2026 മെയ് 30 വരെ അല്ലെങ്കിൽ അടുത്ത ഉത്തരവുണ്ടാകുന്നതുവരെ നീട്ടാൻ കാബിനറ്റ് അപ്പോയിന്റ്‌മെന്റ്സ് കമ്മിറ്റി (Appointments Committee of the Cabinet – ACC) അനുമതി നൽകിയെന്ന് പ്രസ്താവനയിൽ പറയുന്നു. ഇന്ത്യയുടെ രണ്ടാമത്തെ സംയുക്ത സേനാ മേധാവിയാണ് ജനറൽ അനിൽ ചൗഹാൻ.
1981-ൽ ഇന്ത്യൻ സൈന്യത്തിൽ ചേർന്ന അദ്ദേഹം, സൈനിക ജീവിതത്തിൽ നിരവധി സുപ്രധാന പദവികൾ വഹിച്ചിട്ടുണ്ട്. മികച്ച സേവനങ്ങൾക്ക് പരമ വിശിഷ്ട സേവാ മെഡൽ, ഉത്തം യുദ്ധ സേവാ മെഡൽ, അതി വിശിഷ്ട സേവാ മെഡൽ, സേനാ മെഡൽ, വിശിഷ്ട സേവാ മെഡൽ എന്നിവ ലഭിച്ചിട്ടുണ്ട്.
